नेपाली दर्शकमाझ समेत चर्चा बटुलिरहेको नेटफ्लिक्स सिरिज 'मुसाफिर क्याफे' को दोस्रो सिजन आउने भएको छ।
नेटफ्लिक्स इन्डियाले बुधबार यसको औपचारिक घोषणा गरेको हो। दोस्रो सिजनमा पनि विक्रान्त मेसी, वेदिका पिन्टो र महिमा मकवाना मुख्य भूमिकामा रहनेछन्।
पहिलो सिजन सार्वजनिक भएको केही दिनमै नेटफ्लिक्सले दोस्रो सिजनलाई 'ग्रीनलाइट' दिएको हो। पहिलो सिजन भावनात्मक मोडमा टुंगिएपछि दर्शकमाझ 'चन्दर अन्ततः सुधासँग मिल्छ कि प्रीतिसँग?' भन्ने विषयमा व्यापक बहस भएको थियो।
नेटफ्लिक्स इन्डियाकी सिरिज प्रमुख तान्या बामीले 'मुसाफिर क्याफे'ले दर्शकको मन जितेको र यसको अन्त्य तथा पात्रहरूबारे सामाजिक सञ्जालमा व्यापक चर्चा भएको बताएकी छन्। उनका अनुसार दोस्रो सिजनले प्रेम, प्रतीक्षा र सम्बन्धका भावनात्मक आयामलाई अझ गहिराइमा लैजानेछ।
श्रृंखलाकी क्रियटर तथा लेखक शरण्या राजगोपालले दोस्रो सिजनमार्फत चन्दर, सुधा र प्रीतिको कथा नयाँ मोडमा पुग्ने बताएकी छन्।
पहिलो सिजनमा कथा दुई समयरेखामा अघि बढ्छ- सन् २०१८ मा चन्दर र सुधाको गहिरो प्रेम सम्बन्ध र सन् २०२६ मा प्रीतिसँग चन्दरको विकसित हुँदै गएको सम्बन्ध।
अन्तिम भागमा सुधा मंसुरीस्थित ‘मुसाफिर क्याफे’मा चन्दरलाई भेट्न आउँछिन्। चन्दरले आफू अझै सुधालाई नै आफ्नो साँचो प्रेम मानिरहेको स्वीकार गर्छ भने प्रीतिले चन्दर विवाहका लागि तयार भएको भ्रम पाल्छिन्। त्यहीँ कथा अधुरो मोडमा रोकिन्छ।
'मुसाफिर क्याफे' शरण्या राजगोपालद्वारा सिर्जित तथा लिखित सिरिज हो। यसको निर्देशन रूचिर अरूणले गरेका हुन्। यो दिव्य प्रकाश दुबेको पुस्तकका पात्रहरूबाट प्रेरित छ।
पहिलो सिजनले नेपाली दर्शकमाझ समेत राम्रो चर्चा पाएको छ।
