कुनै समय आफ्नो चकलेटी लुक्स र रोमान्टिक छविका कारण निर्माताहरूको रोजाइमा पर्ने गरेका अभिनेता हुन्- आकाश श्रेष्ठ। तर, विगत दुई वर्षयता उनी ठूलो पर्दाबाट टाढै थिए।
शुक्रबारदेखि प्रदर्शनमा आउन लागेको फिल्म 'हर्ष' मार्फत भने दर्शकले आकाशलाई पुनः हलमा देख्न पाउने भएका छन्। यद्यपि, फिल्ममा उनी मुख्य भूमिकामा नभई केमियो' (अतिथि) भूमिकामा मात्र प्रस्तुत भएका हुन्।
निर्माण पक्षले आकाशको अभिनय रहेकोबारे यसअघि जानकारी दिएको थिएन।
बुधबार साँझ सम्पन्न प्रिमियर शोमा फिल्म हेर्न पुगेका दर्शक र सञ्चारकर्मीले पर्दामा अचानक आकाशलाई देखेपछि मात्र उनको अभिनय रहेको खुलेको हो।
पछिल्लो समय म्युजिक भिडिओमा व्यस्त रहे पनि आकाश फिल्मको मुख्य भूमिकामा देखिन छाडेका छन्। उनले नयाँ फिल्ममा सम्झौता गरेको खबर पनि बाहिर आएको छैन। यस्तो अवस्थामा केवल अतिथि भूमिकामा देखिनुले उनी फिल्म क्षेत्रमा सुस्ताएका हुन् वा राम्रो स्क्रिप्टको पर्खाइमा छन् भन्ने प्रश्न उब्जाएको छ।
फ्यानहरूका लागि भने लामो अन्तरालपछि आकाशलाई ठूलो पर्दामा देख्न पाउनु 'बोनस' साबित हुन सक्छ। तर, 'लिड हिरो' का रूपमा उनलाई अब कहिले देख्न पाइने हो, त्यो भने अझै निश्चित छैन।
एकता पौडेलको निर्देशनमा बनेको 'हर्ष' ले प्रिमियरमा तारिफ बटुलेको छ। फिल्मको कथावस्तु, प्रस्तुति र कलाकारहरूको अभिनयको प्रशंसा गरिएको छ।
फिल्ममा खगेन्द्र लामिछाने, वर्षा राउत, नीर शाह, सन्तोष पन्त, साइमन बादी, शर्मिला मल्ल, माओत्से गुरूङ, विशाल पहाडी, निमा पाण्डे, लुनिभा तुलाधर, अंशु महर्जन, रेनु प्रधान, सुवर्ण थापा, सृष्टि महर्जन, सिर्जना नापित लगायतको अभिनय छ।
सिनेमा हलहरूले 'हर्ष' को अग्रिम टिकट बुकिङ समेत खुलाइसकेका छन्।
-1756446574.jpg)
-1746009348.jpg)
