गुड फ्राइडे सिनेमा
पछिल्ला दशकमा कोरियाली सिनेमा संसारभर फैलिइसकेको छ। कोरियाली निर्देशक बोङ जोन हु निर्देशित 'प्यारासाइट' ले कान र अस्करमा प्रमुख विधाका अवार्ड जितेपछि यो झनै व्यापक भयो।
थ्रिलर, प्रेम, कमेडी, राजनीतिदेखि जीवन दर्शनसम्मका विषयमा उत्कृष्ट फिल्म बनाउँदै आएको कोरियाका केही राम्रा फिल्म युट्युबमा अंग्रेजी सबटाइटलसहित हेर्न पाइन्छ।
आज हामीले यस्तै एउटा उत्कृष्ट फिल्म सिफारिस गरेका छौं।
फिल्म हो 'स्क्यान्डल मेकर्स'।
काङ ह्यओङ–चोलले लेखन तथा निर्देशन गरेको यो कमेडी–ड्रामा सन् २००८ मा रिलिज भएको हो। यो सो वर्षकै सबभन्दा धेरै कमाइ गर्ने कोरियाली फिल्म पनि हो।
यसको कथा ह्योन–सु नामका युवकबाट सुरू हुन्छ। पूर्वटिन आइडल ह्योन–सु उमेरले तीसको दशकमा छन् र एक रेडियो डिजेका रूपमा काम गर्छन्।
उनको कार्यक्रममा ह्वाङ जोंग–नाम नामकी युवतीले फोन गर्छिन् र एकल महिलाका रूपमा बाँचिरहेको आफ्नो जीवन कथा सुनाउँछिन्। उनले चाँडै आफ्ना बुबासँग भेट्ने कुरा पनि भन्छिन्।
पछि ती युवती ह्योन–सुकै अपार्टमेन्टमा आइपुग्छिन्। उनका साना छोरा पनि हुन्छन्।
अब ह्योन–सुलाई थाहा हुन्छ कि ह्वाङ जोंग–नाम उनकै छोरी हुन्। अनि ती बालक उनका नाति।
युवतीले आफ्नो वास्तविक नाम जे–इन भएको र उनकी आमा जोंग–नाम नै ह्योन–सुकी पहिलो प्रेम भएको बताउँछिन्।
ह्योन–सु यो कुरा विश्वास गर्न चाहँदैनन्। त्यसैले उनीहरूको डिएनए परीक्षण गरिन्छ। उनीहरू साँच्चिकै बाबुछोरी भएको पुष्टि हुन्छ।
जे–इनको सपना गायिका बन्ने छ। तर उनी चर्चित भएपछि आफू उनको बुबा हुँ भन्ने सार्वजनिक हुने डर ह्योन–सुमा हुन्छ। त्यसैले सकेसम्म यो कुरा लुकाउन खोज्छन्।
यहीबीच जे–इनका बच्चाका बाबु पार्क साङ–युन फेला पर्छन्। पार्क साङ–युनलाई जे–इन र ह्योन–सुबीच प्रेम सम्बन्ध भएको सोच्छन्।
अब यो कथा कसरी अगाडि बढ्ला?
यो कथा जान्न 'स्क्यान्डल मेकर्स' हेर्नुहोस्।
वर्षकै सुपरहिट र सबभन्दा धेरै कमाउने यो फिल्मले २२ वटा अवार्ड जितेको थियो।
हेर्नुहोस् युट्युबमा अंग्रेजी सबटाइटलसहितः
-1746009348.jpg)
