गुड फ्राइडे सिनेमा
पछिल्ला दशकमा कोरियाली सिनेमा संसारभर फैलिइसकेको छ। कोरियाली निर्देशक बोङ जोन हु निर्देशित 'प्यारासाइट' ले कान र अस्करमा प्रमुख विधाका अवार्ड जितेपछि यो झनै व्यापक भयो।
थ्रिलर विधामा कोरियन फिल्म उत्कृष्ट मानिन्छन्। रहस्य, सस्पेन्स र कथामा आउने रोचक मोडका कारण फिल्म पूरा नहेरून्जेल चित्त बुझ्दैन। सँगै बलियो कथा, कलाकारको अब्बल अभिनय र प्रस्तुतिले फिल्मलाई अर्को तहमा पुर्याएको पाइन्छ।
आज हामीले तपाईंहरूलाई यस्तै रोचक र इतिहास रचेको उत्कृष्ट थ्रिलर, एक्सन कोरियन फिल्म सिफारिस गरेका छौं जुन युट्युबमा उपलब्ध छ। अंग्रेजी र हिन्दी दुवै भाषामा डबिङ गरिएको लिंक युट्युबमा पाइन्छ।
फिल्म हो 'ट्रेन टू बुसान'।
सन् २०१६ मा रिलिज यो ब्लकबस्टर फिल्म योन सांग–होले निर्देशन गरेका हुन्। सन् २०२५ मा 'द न्यूयोर्क टाइम्स' ले सार्वजनिक गरेको '२१ औं शताब्दीका उत्कृष्ट फिल्म' को सूचीमा पनि यो अटाएको थियो।
ट्रेन टू बुसानले १० भन्दा बढी राष्ट्रिय तथा अन्तर्राष्ट्रिय अवार्ड जितेको छ भने दर्जनभन्दा बढीमा मनोनयनमा परेको छ।
फिल्मका मुख्य पात्र हुन् सियोक–वू। उनी लगानी कोष प्रबन्धकका रूपमा काम गर्छन्।
सियोक–वू रिसाहा र रूखो स्वाभावका छन्। उनको श्रीमतीसँग सम्बन्ध विच्छेद भइसकेको छ। उनीहरूकी एक छोरी सू–आन हुन्छिन्।
छोरी आफैसँग राख्छु भने पनि सियोक–वूसँग उनलाई दिने समय हुँदैन। सियोक–वूकी आमाले नातिनीको हेरविचार गर्छिन्।
सू–आन भने जन्मदिनको अवसरमा आफ्नी आमा भेट्न जान चाहन्छिन्। सियोक–वूले अहिले नभ्याउने र अर्को साता जाने भन्छन्।
तर सियोक–वू एक एउटा भिडिओ हेर्छन् जसमा सू–आन गीत गाइरहेकी हुन्छिन्। सो कार्यक्रममा आफू नभएकाले छोरी आत्तिएको देखेर उनलाई नराम्रो लाग्छ। अन्ततः उनी छोरीको इच्छा पूरा गर्न बुसान जान रेल चढ्छन्।
केटिएक्स–१०१ रेलमा अर्का मुख्य पात्र सांग–ह्वा र उनकी गर्भवती पत्नी सियोङ–क्यो पनि हुन्छन्।
रेल छुट्नै लाग्दा एक बिरामी युवती चढ्छिन्। केही समयमै उनी जम्बीमा परिणत हुन्छिन्। त्यसपछि एक रेल परिचारिकालाई टोक्छिन्। त्यसपछि रेलभित्र संक्रमण तीव्र गतिमा फैलिन थाल्छ।
समाचार र फोन संवादबाट देशभर महामारी फैलिसकेको थाहा हुन्छ। महामारीकै कारण आमाको पनि मृत्यु भएको सियोक–वूले थाहा पाउँछन्।
रेलमा आतंक सिर्जना भएपछि नजिकैको स्टेसनमा रोक्ने आदेश दिइन्छ। तर त्यहाँ पनि सबै सैनिकहरू संक्रमित भइसकेका हुन्छन्।
अफरातफरीका क्रममा यात्रुहरू अलग अलग डब्बामा छुट्टिन्छन्। अन्ततः रेल सिधै बुसान लैजाने निर्णय हुन्छ, जहाँ सेनाले क्वारेन्टिन क्षेत्र बनाएको हुन्छ।
तर रेल बुसान नपुग्दै यस्तो घटना हुन्छ जसले सबै प्रयास बिफल बनाइदिन्छ। यही क्रममा सियोक–वूलाई थाहा हुन्छ, आफू कार्यरत कम्पनी नै अप्रत्यक्ष रूपमा यो महामारीको कारण हो।
यसपछि पनि सियोक–वू र अरू यात्रुको संघर्ष जारी रहन्छ।
के उनीहरू बाँच्लान्?
वा सबै जम्बी बन्लान्?
यो थाहा पाउन फिल्म नै हेर्नुहोला।
हेर्नुस् हिन्दी डबमाः
-1746009348.jpg)
