गुड फ्राइडे सिनेमा
अरब सागरको किनारमा रहेको माछा मार्ने सानो सहर हो मालपे। सामान्य देखिने यो ठाउँभित्र धेरै मानिसका आफ्नै कथा छन्, आफ्नै रहस्य छन्।
यही मालपेको पृष्ठभूमिमा बनेको फिल्म हो— उलिदावरू कन्दन्ते।
सन् २०१४ मा रिलिज भारतीय कन्नड भाषाको यो फिल्म एउटा हत्याको घटनाबाट सुरू हुन्छ।
तर यसको विशेषता के भने, यहाँ एउटा घटना मात्र छैन। एउटै घटनालाई पाँच फरक पात्रले आफ्नै नजरबाट सुनाउँछन्। कसैका लागि त्यो घटना अपराध हो, कसैका लागि बाध्यता, कसैका लागि विगतको हिसाब।
त्यही कारण फिल्मको नाम पनि राखिएको छ 'उलिदावरू कंदंते', अर्थात् 'जसरी अरूले देखे'।
फिल्मको कथा कृष्ण जन्माष्टमीको समयबाट सुरू हुन्छ। उडुपी र आसपासका क्षेत्रमा उत्सवको माहोल छ। मानिसहरू विभिन्न पात्रको भेषमा सडकमा हिँडिरहेका छन्। कतै भगवान र ऐतिहासिक पात्रको रूप देखिन्छ भने कतै ढोलको तालमा बाघ बनेर नाचिरहेका मानिसहरू।
यही उत्सवको बीचमा मालपेमा एउटा घटना हुन्छ, जसले धेरै मानिसको जीवनलाई जोडिदिन्छ।
यही घटनाको खोजीमा लाग्छिन् खोज पत्रकार रेजिना।
रेजिना यस्तो कथा खोजिरहेकी हुन्छिन्, जसलाई एउटा मात्र दृष्टिकोणबाट भन्न सकिँदैन। किनकि घटनासँग जोडिएका सबै मानिससँग आफ्नै अनुभव र आफ्नै सत्य हुन्छ।
फिल्मको सुरूआतमा देखाइन्छ— रिचर्ड एन्थोनी उर्फ रिची प्रहरीबाट भागिरहेका हुन्छन्। प्रहरी उनलाई हत्या आरोपमा खोजिरहेका हुन्छन्। रेजिनाले रिचीलाई बाल्यकालदेखि चिनेकी हुन्छिन्, त्यसैले उनी यो घटनाको वास्तविकता बुझ्न अनुसन्धान सुरू गर्छिन्।
पहिलो कथा जोडिन्छ स्थानीय काजु व्यापारी शैलेशसँग।
शैलेश रिची र उसको बाल्यकालको साथी रघु दुवैलाई चिन्छन्। रिचीले आठ वर्ष रिमान्ड होममा बिताएका थिए भने रघु भागेर मुम्बई पुगेका थिए। त्यहाँ उनले होटलमा काम गरेपछि एउटा स्थानीय ग्याङसँग सम्बन्ध बनाएका थिए।
मुम्बईमा शैलेशको भेट रघुसँग हुन्छ। त्यहाँबाट रघुको विगत, उनको संघर्ष र उनको योजनाका पाटा खुल्दै जान्छन्।
रघु आफ्नी आमासँग नयाँ जीवन सुरू गर्न चाहन्छन्। तर त्यसका लागि उनले एउटा जोखिमपूर्ण बाटो रोज्छन्। उनले एउटा झोला चोरी गर्छन्, जुन एउटा ठूलो कारोबारसँग जोडिएको हुन्छ।
त्यसपछि उनी मालपे फर्किन्छन्। तर विगतबाट भागेर आएको मानिसलाई विगतले सजिलै छोड्दैन।
अर्कोतर्फ रिचीको कथा आउँछ। रिची स्थानीय व्यापारी तथा ग्याङस्टर शंकर पुजारीका लागि काम गर्ने युवक हुन्।
उनको स्वभाव आक्रामक छ। उनी आफ्नो तरिकाले समस्या समाधान गर्ने मानिस हुन्। यही कारण उनको जीवनमा धेरै दुश्मनी र विवाद जोडिएका छन्।
पुजारीले रिची र उनका साथी दिनेशलाई आफ्ना कर्मचारी बालुलाई नियन्त्रणमा लिन जिम्मेवारी दिन्छन्।
कृष्ण जन्माष्टमीको भीडभाड, उत्सव र रंगीन वातावरणबीच रिची, बालु र रघुको कथा एकअर्कासँग जोडिन थाल्छ।
उता रघुकी आमा रत्नक्का आफ्नो छोराको प्रतीक्षामा हुन्छिन्। श्रीमानको मृत्युपछि संघर्ष गर्दै जीवन बिताएकी रत्नक्का छोराले नयाँ जीवन दिने आशामा हुन्छिन्।
उनको संसार छोरा र उसको भविष्य वरिपरि घुमिरहेको हुन्छ।
यसैबीच बालुको जीवनमा पनि एउटा रहस्य जोडिएको हुन्छ। समुद्रसँग जोडिएको एउटा घटनाले उनको जीवन परिवर्तन गर्ने सम्भावना देखाउँछ।
तर त्यो रहस्यले उनलाई कहाँ पुर्याउँछ भन्ने कुरा फिल्मको अर्को महत्वपूर्ण पक्ष हो।
फिल्मको सबैभन्दा ठूलो विशेषता यही हो— यसले कुनै घटनालाई सिधा रूपमा मात्र देखाउँदैन।
एउटै घटनालाई फरक मानिसको आँखाबाट हेर्दा त्यसको अर्थ कसरी बदलिन्छ भन्ने कुरा फिल्मले देखाउँछ।
त्यसैले उलिदावरू कन्दन्ते अपराध कथा मात्र होइन, यो मानिस, उसको विगत, उसको निर्णय र उसको दृष्टिकोणको कथा हो।
रिलिजको समयमा राम्रो कमाउन नसके नसकेको यो फिल्म पछि 'कल्ट क्लासिक' का रूपमा स्थापित भयो। कन्नड सिनेमाको सूचीमा यसको महत्वपूर्ण स्थान छ।
भिडिओ हेर्न Watch on Youtube मा क्लिक गर्नुहोस्।
