गुड फ्राइडे सिनेमा
कोच्ची सिटी (भारत) प्रहरीका लागि त्यो रात सामान्य थिएन।
डिवाइएसपी अब्राहम कोशी अचानक बेपत्ता हुन्छन्। केही समयपछि उनको शव जिप्समको मैदानमा भेटिन्छ।
शवको अवस्था देखेर प्रहरी अधिकारीहरू नै स्तब्ध हुन्छन्— उनका आँखा र मुटु निकालिएको हुन्छ।
घटनाको अनुसन्धान डिसीपी क्याथरिनको नेतृत्वमा सुरू हुन्छ। पोस्टमर्टम रिपोर्टले अब्राहमको शरीरमा औषधि रहेको देखाउँछ। तर अचम्मको कुरा, उनीमाथि आक्रमण हुँदा उनले प्रतिकार गरेको कुनै संकेत भेटिँदैन।
प्रहरीले घटनाको अनुसन्धान गरिरहेकै हुन्छ। त्यहीबीच अर्का एक प्रहरी अधिकारी बेपत्ता हुन्छन्। केही दिनपछि उनको शव प्रहरी चौकीकै पछाडिपट्टि भेटिन्छ। शवसँगै एउटा लेडी जस्टिसको मूर्ति राखिएको हुन्छ।
अन्वर हुसेनलाई यो संयोग मात्र होइन भन्ने लाग्छ।
अन्वर मनोवैज्ञानिक हुन्। उनी एसिपी अनिल माधवनको सिफारिसमा कोच्ची सिटी प्रहरीमा परामर्शदाता अपराधशास्त्रीका रूपमा काम गर्छन्। अपराधीको मनोविज्ञान बुझ्ने उनको क्षमता प्रहरी अनुसन्धानमा उपयोगी हुन्छ।
अन्वरले पहिलो र दोस्रो घटनाका फरेन्सिक तस्बिरहरू तुलना गर्छन्। दुवै घटनामा भेटिएको वस्तु र पोस्टमर्टम रिपोर्टमा समानता देखिन्छ। घटनास्थलमा राखिएको मूर्ति नै हत्याराको कुनै संकेत हुन सक्ने उनको अनुमान हुन्छ।
त्यसैबीच अर्को रहस्य थपिन्छ। प्रहरी चौकीको सिसिटिभी फुटेजमा छेडखानी गरिएको हुन्छ। यसको अर्थ हत्यारा प्रहरीको सुरक्षा प्रणालीबारे जानकार मात्र छैन, प्रविधिको प्रयोग गर्न पनि सक्षम छ।
अन्वरले एन्ड्र्यु नामका ह्याकरको सहयोग लिन्छन्।
प्रहरीले हत्यारा समात्न नयाँ योजना बनाउँछ। तर प्रहरीको योजना सफल हुँदैन। ड्युटीमै रहेका क्याथरिनका चालक पल्सन अपहरणमा पर्छन्।
पल्सनको स्कुटरमा जडान गरिएको क्यामराको फुटेजमा एउटा डरलाग्दो दृश्य देखिन्छ।
त्यसपछि प्रहरीको अनुमान बदलिन्छ।
तर हत्यारा प्रहरीभन्दा एक कदम अगाडि हुन्छ। पल्सनको शव अन्वरकै घरमा फ्रिज राख्ने बाकसभित्र आइपुग्छ।
यसपछि के होला?
यसका लागि मलयालम फिल्म 'अञ्जाम पथिरा' हेर्नुहोला।
यो क्राइम थ्रिलर फिल्म सुपरहिट भएको थियो। सन् २०२० मा वर्षकै सबभन्दा धेरै कमाउने फिल्म यही हो।
हिन्दीमा यो फिल्म 'पुलिस स्टोरी' नाममा छ।
हेर्नुस् युट्युबमाः
