हास्यकलाकार हरिवंश आचार्यले नेपाली खेलाडीको सम्मानमा खेल गीत ल्याएका छन्।
मंगलबार महसंचार युट्युब च्यानलमार्फत 'हामी नेपाली, हाम्रो खेलाडी' बोलको खेल गीत सार्वजनिक गरिएको हो। दिपराज थापाको शब्द रहेको गीतमा विशाल निरौलाले संगीत तथा एरेन्ज गरेका छन्।
गीतकार थापासँगै सुशिला पौड्याल र गौपाल पौड्याल यो गीतका निर्माता हुन्। गीतको भिडिओमा नयाँ-पुराना खेलाडीका यथार्थ श्रव्यृदृश्य समेटिएका छन्।
नेपाल टि २० विश्वकपमा छनोट भएको र नेपालमा खेलप्रतिको इज्जत बढिरहेको माहोलमा यो गीत ल्याएको गायक आचार्यले बताए।
'पुराना खेलाडीलाई अहिलेको पुस्ताले बिर्सिसकेको अवस्था उहाँहरूप्रति पनि सम्मान हुने हिसाबले गीत गाएँ। त्यसैले गीतको भिडिओमा पुराना-नयाँ खेलाडीले खेलेका रियल दृश्य राखेका छौं। खेलाडीप्रति सम्मान बोकेको यो गीत नेपालको खेल स्टेडियममा पनि बज्छ भन्ने हाम्रो अपेक्षा छ,' उनले भने।
