लोकगायक अर्जुन सापकोटाको पछिल्लो गीत 'झलिको' छोटो समयमै युट्युबमा करोड क्लबमा प्रवेश गरेको छ।
सार्वजनिक भएको तीन साता नबित्दै आइतबार गीतले युट्युबमा एक करोड (१० मिलियन) भ्युजको आँकडा पार गरेको हो।
१९ दिनमै युट्युबमा एक करोडपटक हेरिएको गीतमा अर्जुनसँगै चर्चित गायिकाद्वय मेलिना राई र समीक्षा अधिकारीको स्वर छ।
यो गीत रिलिज हुनासाथ टिकटक, रिल्स लगायतका सामाजिक सञ्जालमा समेत निकै चर्चामा रह्यो। गीतका प्रेमिल शब्द, मिठासपूर्ण संगीत र भिडिओको कथावस्तुलाई दर्शक तथा श्रोताले रूचाएका हुन्।
यसअघि अर्जुनका 'पछ्यौरी लिसियो', 'बस्यौ अलक्कै', 'दुःख साटम्ला' जस्ता गीतहरू श्रोतामाझ लोकप्रिय भए पनि 'झलिको' उनका गीतहरूमध्ये सबभन्दा कम समयमा करोड क्लबमा प्रवेश गर्ने गीत बनेको छ।
गीतले छोटो समयमै धेरै माया पाएकोमा खुसी व्यक्त गर्दै गायक सापकोटाले यस सफलताले थप ऊर्जा मिलेको बताए।
हाल विभिन्न महोत्सवमा व्यस्त रहेका उनले भने, 'गीतमा हामीले पहिलेदेखि नै मेहनत गरेका थियौं। दर्शकले रूचाउनुहुन्छ भन्ने अपेक्षा त थियो, तर यति छोटो समयमै यति धेरै माया पाइएला भन्ने चाहिँ सोचेको थिइनँ।'
सांगीतिक क्षेत्रका मात्र नभएर चलचित्रकर्मी तथा अन्य विभिन्न क्षेत्रका व्यक्तित्वहरूबाट समेत प्राप्त सकारात्मक प्रतिक्रियाले आफूलाई आगामी दिनमा अझ स्तरीय सिर्जना ल्याउन प्रेरित गरेको उनले बताए।
सन्तोष सापकोटाका शब्द र अर्जुन स्वयंको संगीत रहेको गीतमा कृष्ण रेउलेको थेगो छ। गीतमा संगीत संयोजन एचबीएन किस्मतले गरेका हुन्। गीतमा प्रदीप रोदनको कविता वाचन छ।
विशाल घिमिरेको निर्देशन रहेको भिडिओमा अर्जुन सापकोटा र कुसुम भण्डारीको अभिनय तथा नृत्य छ। साथमा शिवु पाण्डे, राजेन्द्र अर्याल, सन्तोष सापकोटा लगायतको समेत अभिनय छ।
दीपा सिंखडा र विशाल घिमिरेको परिकल्पनामा तयार भिडिओमा मुकेश नेपालीको कोरियोग्राफी, बुद्ध थापाको छायांकन र दिन्शन शाहको सम्पादन छ।
-1746009348.jpg)
