गायिका अस्मिता अधिकारी गायन रियालिटी शो 'नेपाल आइडल जुनियर' मा निर्णायकको भूमिकामा आबद्ध भएकी छन्। यस अवसरमा उनले सामाजिक सञ्जालमार्फत खुसी साट्दै पुराना दिनहरू सम्झिएकी छन्।
उनले केही वर्षअघि आफू प्रतिस्पर्धीको रूपमा नेपाल आइडलको मञ्चमा उभिएको क्षण उनले स्मरण गर्दै लेखेकी छन्- 'धेरै समय भएको छैन, प्रतिस्पर्धीको रूपमा नेपाल आइडलको मञ्चमा उभिँदै डराउँदै-डराउँदै 'मेरो प्यारो मान्छे तिमी' गाएर अडिसन दिएको। त्यसपछि तपाईंहरूबाट पाएको अपार माया र विश्वासकै उपहारस्वरूप, स्टुडिओ, स्टेज हुँदै आज फेरि उही मञ्चमा फरक जिम्मेवारीका साथ फर्किन पाएकी छु।'
कार्यक्रम प्रस्तोताका रूपमा आफ्नै श्रीमान महेश काफ्ले आबद्ध भएकाले कार्यक्रम अझ रोचक र स्मरणीय बन्ने उनले विश्वास व्यक्त गरेकी छन्।
अस्मिताले १४ वर्षमुनिका प्रतिभाशाली बालबालिकालाई लक्षित गर्दै डिजिटल अडिसन खुलिसकेको जानकारी दिँदै अवसरको सदुपयोग गर्न आग्रह गरेकी छन्।
गायन रियालिटी शो 'नेपाल आइडल' को सफल यात्रापछि 'नेपाल आइडल जुनियर' दर्शकमाझ आउन लागेको हो। यसको पहिलो संस्करण अप्रिलको पहिलो हप्तादेखि दर्शकमाझ आउने तयारीमा छ।
'नेपाल आइडल जुनियर' को पहिलो सिजनको निर्णायकमा सुगम पोखरेल, सुवानी मोक्तान र अस्मिता अधिकारी छन्। कार्यक्रमका प्रस्तोताका रूपमा गायक महेश र डा. शरिसा श्रेष्ठ छन्।
-1746009348.jpg)
