आशिष थापा फिनल्यान्डमा बस्दै आएका नेपाली उद्यमी हुन्। उनी फिनल्यान्ड गएको १५ वर्ष भयो।
विद्यार्थी भिसामा पढ्न गएका आशिष अहिले त्यहाँ आफ्नै व्यवसाय सञ्चालन गरिरहेका छन्।
उनी आफ्नो कम्पनी नर्डिक कोलाब ओय मार्फत् न्युट्रिसनल सप्लिमेन्ट उत्पादन गर्छन्।
कम्पनीले ह्वे (दूध प्रशोधन गर्दा निस्किने उच्च प्रोटिनयुक्त उप–उत्पादन), क्रियाटिन, विभिन्न प्रकारका एमिनो एसिडका पाउडर तथा वनस्पति (प्लान्ट) आधारित १५ प्रकारका उत्पादन गरिरहेको छ।
'हाम्रा उत्पादन क्यालोर ब्रान्डमा उपलब्ध छन्,' उनले भने, 'यी उत्पादन अधिकांश पाउडर र सफ्टजेलका रूपमा छन्।'
उनका अनुसार न्युट्रिसनल सप्लिमेन्ट भनेको शरीरलाई आवश्यक पर्ने पोषक तत्व पूरा गर्न प्रयोग गरिने अतिरिक्त आहार हो।
दैनिक खानेकुराबाट पर्याप्त मात्रामा नपुग्ने भिटामिन, मिनरल, प्रोटिन वा अन्य पोषक तत्व पूर्ति गर्न यस्ता उत्पादन प्रयोग गरिन्छ।
कम्पनीमा आशिषसहित सात जना साझेदार छन्। न्युट्रिसनल सप्लिमेन्ट उत्पादन गर्न करिब ५ लाख युरो लगानी गरेको उनले बताए।
न्युट्रिसनल सप्लिमेन्ट बनाउने उनीहरूको आफ्नै उद्योग भने छैन। उत्पादकलाई आफ्नो ब्रान्डमा उत्पादन गर्न दिएका हुन्।
उनको समूहले सन् २०२४ मा कम्पनी दर्ता गरेको हो। उत्पादन बजारमा जान थालेको भने चार/पाँच महिना मात्रै भयो।
'बजारमा आएको छोटो समयमै उपभोक्ताबाट राम्रो प्रतिक्रिया पाएका छौं,' उनले भने, 'यसले हामीलाई हौसला मिलेको छ।'
उत्पादित सामग्री हाल फिनल्यान्डमै बिक्री भइरहेको छ।
आशिष सन् २०११ मा स्नातक तहमा पढ्न फिनल्यान्ड गएका हुन्।
'फिनल्यान्ड पढ्नका लागि राम्रो गन्तव्य मानिन्छ। निःशुल्क पढ्न पाइने भएकाले यो देश रोजेँ,' उनले भने।
उनले सुरूमा भाषा विश्वविद्यालयबाट पढाइ अघि बढाए। पढाइसँगै कुकका रूपमा रेस्टुरेन्टमा काम गरे। यो कामले उनको खाने–बस्ने खर्च जुटाउन सहयोग पुर्यायो।
यसरी उनले ७–८ महिना काम गरे।
आशिषले आफ्नो पढाइ हागाहेलिया विश्वविद्यालयमा सारे। त्यहाँ होटल तथा रेस्टुरेन्ट म्यानेजमेन्ट विषय लिएर सुरूबाटै पढ्न थाले।
त्यहाँ उनले चीज फ्याक्ट्रीमा काम पाए। मेसिन सफा गर्ने, पाटपुर्जा खोल्ने–जोड्ने जस्ता प्राविधिक काम गर्थे।
'त्यहाँ काम गर्दा मैले फुड हाइजिन, फुड प्रोसेसिङ र मेसिनसम्बन्धी बुझ्ने मौका पाएँ,' उनले भने, 'त्यहाँ सिकेको सीपले अहिले सहज भएको छ।'
उनले त्यहाँ पाँच वर्ष काम गरे। त्यसपछि एक वर्ष फास्टफुड रेस्टुरेन्टमै कुकका रूपमा काम गरे।
फास्टफुडपछि 'फुड आइक्यू' नामक कम्पनीमा काम सुरू गरे।
उक्त कम्पनीमा उनले एक ब्रान्डका लागि उत्पादनमा सहयोग गर्नुका साथै फूड टेक्नोलोजी अनुसन्धानसम्बन्धी काम गरे।
आशिषले अहिले व्यवसायसँगै उक्त जागिरलाई निरन्तरता दिइरहेका छन्। सो कम्पनीमा उनी फ्याक्ट्री डाइरेक्टरका रूपमा कार्यरत छन्।
'फ्याक्ट्रीमै काम गर्ने भएकाले जागिरसँगै व्यवसाय गर्न सहज भएको छ,' उनले भने।
फुड आइक्यूले फिनल्यान्डका स्थानीय ब्रान्डदेखि स्विडेन, इस्टोनिया लगायत देशका ठूला ब्रान्डका लागि उत्पादन बनाउँदै आएको छ।
'हाम्रो पनि उत्पादन यहीँ हुने हो,' उनले भने।
फिनल्यान्डमा व्यवसाय सञ्चालनमा खासै समस्या नभए पनि अहिले विश्वव्यापी आर्थिक मन्दीका कारण वातावरण चुनौतीपूर्ण रहेको उनको अनुभव छ।
आशिषको कम्पनीले क्यालोर ब्रान्डका उत्पादन बंगलादेश र नेपाली बजारमा पनि छिट्टै ल्याउने योजना बनाएको छ।
आगामी दिनमा कम्पनीलाई अझ विस्तार गर्दै नयाँ फ्याक्ट्री स्थापना गर्ने उनको लक्ष्य छ।
'व्यवसायका लागि कहिल्यै पूर्ण रूपमा राम्रो समय हुँदैन, राम्रो बनाउन आफैले काम गर्ने हो,' उनले भने।
