सिभिल बैंकले आफूलाई प्राप्ति गर्न भन्दै हिमालयन बैंकलाई आग्रह गरेको चर्चा चलेपछि आइतबार सो कम्पनीको सेयर मूल्य प्रभावित भयो।
दिउँसो सिभिल बैंकको मूल्य ९ प्रतिशतसम्म बढ्यो। केहीबेर कम्पनीको सेयर नै मागअनुसार पूर्ति हुन पाएन। बजारमा सूचीकृत वाणिज्य बैंकमध्ये सिभिलको सेयर सबैभन्दा सस्तो छ।
आइतबार कारोबार हुँदा ९ प्रतिशतसम्म बढेर प्रतिकित्ता १६५ रुपैयाँसम्म पुगेको सो बैंकको मूल्य कारोबार बन्द हुँदा भने १५७ मा झर्यो। अघिल्लो दिन कारोबार बन्द हुँदा कम्पनीको मूल्य प्रतिकित्ता १५० रुपैयाँ थियो।
सिभिलले हिमालयन बैंकलाई प्राप्तिका लागि गरेको आग्रह कसरी चुहावट भयो या यो झुटो हो भन्ने कुरा नेप्सेलाई भने जानकारी नै दिइएन।
यस विषयमा नेप्सेले सिभिल बैंकलाई स्पष्टिकरण सोधेको छ। धितोपत्र सूचीकरण विनियमावली २०७५ को विनियम २२ को (च) मा सूचीकृत धितोपत्रको बजार मूल्यमा असर पार्न सक्ने कुनै घटना वा कारोबार भएमा त्यस्तो विषयको सूचना तुरुन्त दिनुपर्ने व्यवस्था छ।
यो व्यवस्थाअनुसार बैंकले कुनै पनि सूचना तथा जानकारी नगराएको नेप्सेले जनाएको छ। ‘उपर्युक्त सम्वन्धमा त्यस कम्पनीको भनाई के छ? भोलि बजार खुल्नुअघि नै आइपुग्नेगरी पेश गर्न निर्देशन दिइको छ’ नेप्सेले सूचनामा भनेको छ।
