गभर्नर महाप्रसाद अधिकारीले केही दिन अघि बैंकर पक्राउको घटनाबाट यो क्षेत्र आतंकित हुन नहुने बताएका छन्।
आइतबार अर्थ समितिमा भएको छलफलमा अधिकारीले यस्तो बताएका हुन्।
गभर्नर अधिकारीले भने, 'जो साथी पक्राउ पर्नुभएको छ, उहाँहरूले सही काम गर्नु भएको छ भने प्रहरीले राष्ट्र बैंकको प्राविधिक सहयोग खोज्छ नै। गल्ति नै गर्नु भएको छ भने कानुन अनुसार हुन्छ। अरू साथीहरूले आत्तिनु हुँदैन।'
केही समयअघि धितो मूल्यांकनभन्दा कममा ऋण दिएको भन्दै सञ्चुरी कमर्सियल बैंक (हालका प्रभु बैंक) का तत्कालीन ११ जना कर्मचारीहरूलाई केन्द्रीय अनुसन्धान ब्युरो (सिआइबी)ले पक्राउ गरेको थियो।
गभर्नर अधिकारीले प्रहरी र राष्ट्र बैंक दुवै सरकारको अंग भएकोले एकले गरेको काममा अर्कोले सहयोग गर्नुपर्ने बताए। उनले यस्तो घटनामा सुरूमै दुई निकायबीच सहकार्य भएको राम्रो हुने समेत बताए।
उनले आफूहरूले यस विषयमा सिआइबीसँग छलफल गरेको समेत जानकारी दिए।
उनले भने, 'गत साताको घटना राष्ट्र बैंकसँग सहकार्य नगरिकन पनि सकिन्छ भन्ने सिआइबीबाट आयो। नेपाल प्रहरीले गरिरहेको अनुसन्धान सहकारी संस्थाको रहेछ। सहकारीको छानबिन गरिरहँदा त्यसको लहरो तान्दै जाँदा बैंकहरूको कर्मचारीसम्म पुग्नु भएको रहेछ।'
गभर्नर अधिकारीले बैंकिङ क्षेत्रको अवस्थाको जानकारी दिँदै नेपाली बैंकहरू सुरक्षित र बलियो क्षेत्रको रूपमा रहेको समेत स्पष्ट पारे। उनले बैंकहरूको दरिलोपना मापन गर्ने प्राथमिक पुँजी कोषको आधारमा नेपालका बैंकहरूको अवस्था राम्रो रहेको बताए।
उनले यसमा केही बैंकलाई दबाब परेको भए पनि समस्याको तहमा नरहेको जानकारी दिए। उनले बैंकहरूको कर्जाको गुणस्तर केही खस्किएको भए पनि यसमा बाहिरी कारण समेत रहेको बताए।
'अहिले बैंकहरूको खराब कर्जा औसत ३ प्रतिशतभन्दा केही बढी छ। अर्थतन्त्र, बजारको स्थिति र ऋणीको कमाइको क्षमता घटेको कारण पनि यसमा वृद्धि भएको हो,' उनले भने, 'ऋण नतिरे हुन्छ भन्ने अराजक अभिव्यक्तिले पनि समस्या आएको हो।'
यो अराजकता रोक्न सकेनौं भने कर्जाको माग नहुने र अर्थतन्त्र विस्तारमा समस्या हुने समेत उनको भनाइ छ। कतिपयलाई बैंकिङ क्षेत्रलाई धरासायी बनाउन सके अर्थतन्त्र कमजोर बनाउन सकिन्छ भन्ने लागेकोले पनि बैंकहरू र राष्ट्र बैंकमाथि समेत प्रहार भइरहेको उनले बताए।
यो गतिविधिमा राजनीति गासिएको आभाष आफूलाई भएको उनले बताएका छन्। अधिकारीले अहिले नेपाल बैंकहरूमा निक्षेपको एक तिहाई बराबर रकम तरल सम्पत्तिको रूपमा रहेको बताएका छन्।
अहिले बैंकिङ क्षेत्रलाई विदेशी संस्थाहरूले कर्जा दिइरहेकोले पनि यसले सबलता पुष्टि गर्ने उनको भनाइ छ।