नयाँ स्टक आवश्यक रहे नरहेको सम्बन्धमा अध्ययन गर्न बनेको समितिले तीन विकल्प सुझाएर प्रधानमन्त्री समक्ष प्रतिवेदन बुझाएको छ।
समितिले नयाँ स्टकको लागि अनुमति दिन सकिने, हालको नेपाल स्टक एक्सचेन्ज (नेप्से)को पुनर्संरचना गर्नुपर्ने र यी दुवै काम सँगसँगै गर्न सकिने सुझाव दिएको अध्ययन समितिका एक सदस्यले बताए।
हाल सेयर बजारमा लगानीको विविधिकरण गर्न सकिने अवस्था नरहेकोले नयाँ स्टक एक्सचेन्जको आवश्यकता रहेको प्रतिवेदनमा उल्लेख छ। तर, नयाँ स्टक एक्सचेन्ज ल्याउन कारोबारका विविध उपकरण पनि ल्याउनुपर्ने सुझाव दिइएको छ।
यदी नयाँ स्टक एक्सचेन्ज नल्याउने हो भने नेप्सेको पुनर्संरचना गर्नुपर्ने सुझाव राखिएको छ। यसको लागि नेप्सेमा साझेदार लगानीकर्ता भित्र्याउनुपर्ने, सर्वसाधारणमा सेयर जारी गर्न दिइनुपर्ने उल्लेख गरिएको छ।
यी दुवै काम सँगसँगै गर्न सकिने समेत सुझाव दिइएको हो। २०८० माघ ९ गतेको मन्त्रिपरिषद् बैठकले नेपाल राष्ट्र बैंकका सञ्चालक चिन्तामणि सिवाकोटीको संयोजकत्वमा समिति गठन गरेको थियो।
समितिका सदस्यमा अधिवक्ता सिजन गुरागाईं र चार्टर्ड एकाउन्टेन्ट सुजनकुमार आचार्य थिए।
.JPG)
