लक्ष्मी सनराइज बैंकको अगुवाईमा सह वित्तीयकरणमा सहभागी बैंकहरू र सुपर बागमती हाइड्रोपावरबीच सम्झौता भएको छ।
ललितपुर र मकवानपुर जिल्लास्थित बागमती नदीमा निर्माण गर्ने ४१.३१४ मे.वा. क्षमताको सुपर तल्लो बागमती जलविद्युत आयोजनामा लगानी गर्ने सम्झौता सम्पन्न भएको हो।
सो आयोजनाको कुल लागत ९ अर्ब २८ करोड रूपैयाँ रहेको छ। यो सहकार्यले नेपालको नवीकरणीय ऊर्जा परिदृश्यमा महत्त्वपूर्ण भूमिका खेल्नेछ।
सुपर बागमती हाइड्रोपावरले २०७८ माघ १२ मा विद्युत विकास विभागबाट आयोजना निर्माणको लागि विद्युत उत्पादनको अनुमति पत्र लिई २०८० असार २५ मा नेपाल विद्युत प्राधिकरणसँग विद्युत खरिद बिक्री सम्झौता समेत गरिसकेको छ।
सो कम्पनीको प्रवर्द्धक एसियन लाइफ इन्स्योरेन्स कम्पनी र एएनके कन्स्ट्रकशन रहेका छन्।
सो परियोजना निमार्णको लागि लक्ष्मी सनराइज बैंकको नेतृत्वमा सहवित्तीयकरणमा सहभागी बैंकहरुले परियोजना लागतको ७४.३३ प्रतिशत लगानी गर्ने प्रतिवद्धता जनाएका छन् भने बाँकी २५.६७ प्रतिशत रकम प्रवर्द्धक/ संस्थापकहरूको लगानी रहने छ।
सो परियोजनामा लक्ष्मी सनराइज बैंकको कर्जा प्रतिवद्धता ३ अर्ब ४० करोड रहेको छ भने सहवित्तीयकरणमा सहभागी अन्य बैंकहरू मध्ये सह–अगुवा एभरेष्ट बैंकको २ अर्ब ५० करोड तथा सिटिजन्स बैंक इन्टरनेसनलको १ अर्ब लगानी रहेको छ।
सो आयोजना निर्माण सम्पन्न भई विद्युत उत्पादन भएपछि वार्षिक करिब २४३.८ गिगावाट आवर विद्युत राष्ट्रिय प्रसारण लाइनमा जडान हुनुको साथै स्वतन्त्र उर्जा उत्पादकको मध्येको ठूलो परियोजनाको रूपमा रहने विश्वास लिइएको छ।
1623773574-1718183469.jpeg)
