सरकारले गरेको लकडाउनपछि सबै रेष्टुरेन्ट बन्द छन्। डल्ले रेष्टुरेन्टले भने अत्यावश्यकीय सेवामा क्रियाशीलहरुलाई खाना खुवाउँदै आएको छ।
यो समयमा डल्ले रेष्टुरेन्टले २ सय १७ जनालाई दैनिक खाना खुवाउने गरेको रेष्टुरेन्टका सञ्चालक आलोक योञ्जनले बताए।
रेष्टुरेन्टले ड्युटिमा खटिएका १ सय ८० जना प्रहरी, कोरोना भाइरसको उपचार केन्द्र टेकु अस्पताल र प्रयोगशाला शुक्रराज ट्रपिकल अस्पताल टेकुमा क्रियाशील चिकित्सकहरु ६० जना, भाइरससम्बन्धी जानकारी लिने, दिन सरकारले बनाएको निशुल्क टेलिफोन सेवामा क्रियाशील चिकित्सक १२ जना र भाइरसको आशंका लागेका विरामी बोक्न सरकारले तयार पारेको २५ वटा एम्बुलेन्सका चालकहरुलाई खाना खुवाउने गरेको छ।
देशलाई परेको विपत्तीमा घरमा बस्नु भन्दा आफ्नो क्षेत्रबाट सकेको सहयोग गर्ने मनस्थिती बनाएर खाना खुवाउँने गरेको सञ्चालक योञ्जनले बताए।
'हामीसँग जे छ, त्यहि खुवाइरहेका छौं, सञ्चालक योञ्जनले भने,सवारी साधानको पासले गर्दा केही समस्या भएको छ,तर पनि व्यवस्थापन गरिरहेका छौं।'
सुरुमा एक साताका लागि मात्र खाना खुवाउने सोचका बनाएपनि विपत्ती झन बढ्दै गएकोले वैशाख ३ गतेसम्मै खाना खुवाउने रेष्टुरेन्टका अर्का सञ्चालक सुवास गौचनले जानकारी दिए।
डल्लेले सुरक्षाकर्मी र चिकित्सकहरु सहित दुखमा परेकाहरुलाई पनि खाना खुवाउँदै आएको छ।
'केहि खानाका प्याकेटहरु बोकेर हिडेका हुन्छौं, गौचनले भने बाटोमा साह्रै समस्यामा परेकाहरु भेटिएमा उनिहरुलाई दिएर आउछौं।'
साथै डल्लेले समस्यामा परेकाहरुलाई पनि खाना र खाजा खुवाउदै आएकाे छ।
सामाजिक सञ्जाल र समचारलाई आधार मानेर उनिहरुले खाना पुर्याउने गरेको उनले बताए । डल्लेको हालसम्म ९ वटा आउटलेट सञ्चालनमा छ।