मधुमेह तथा थाइराइड रोग विशेषज्ञ डा. शम्भुकुमार चौधरीले रौतहटमा कपडा उद्योग सञ्चालनमा ल्याएका छन्।
रौतहटको वृन्दावन–६, हर्षाहामा रहेको अर्थव टेक्सटाइल साउनदेखि सञ्चालनमा आएको हो।
तीन वर्षदेखि निर्माणाधीन रहेको उद्योग साउनदेखि सञ्चालनमा ल्याइएको र आगामी हप्तादेखि उत्पादित कपडा बजारमा पठाउने तयारी भइरहेको सञ्चालक डा. चौधरीले सेतोपाटीलाई बताए।
डेढ अर्ब रुपैयाँको लागतमा सञ्चालनमा आएको यस उद्योगमा सय जनाभन्दा बढीले रोजगारी पाएका छन्।
‘हामीले कोट, पाइन्ट, सर्ट, टी–सर्ट, ज्याकेट, जुत्ता, बेडसिट, पर्दा र ब्यागलगायतका सामग्रीका लागि आवश्यक कपडा उत्पादन गर्छौं। धागो भने भारत र चीनबाट ल्याउँछौं। उत्पादित कपडा गार्मेन्ट उद्योगलाई बिक्री गर्छौं,’ उनले भने, ‘अहिले दैनिक १० टन कपडा उत्पादन गरिरहेका छौं। उद्योगको दैनिक उत्पादन क्षमता २५ टनको छ। छिट्टै पूर्ण क्षमतामा सञ्चालन गर्ने योजना छ।’
२० वर्षभन्दा बढी समयदेखि चिकित्सक पेसामा सक्रिय रहेका चौधरीले काठमाडौंमा अस्पताल पनि सञ्चालन गरेका थिए।
अहिले भने उनले क्लिनिक मात्र सञ्चालन गरिरहेका छन्। डाक्टरी पेसाभन्दा उद्योग स्थापना गरेर देशको उत्पादन क्षेत्रमा योगदान दिनुपर्ने सोचका साथ आफू यस क्षेत्रमा आएको उनले बताए।
‘बिरामी जाँच्ने काम गर्न धेरै डाक्टर हुनुहुन्छ। अहिले देशलाई उद्योगी चाहिएको छ भन्ने लागेर मेरो ध्यान उद्योगतर्फ गयो,’ उनले भने, ‘कोभिड–१९ महामारीका बेला स्वदेशी गार्मेन्ट उद्योगले कच्चा पदार्थको अभावका कारण उत्पादन रोक्नुपरेको थियो। आयातित सामग्री महिनौं ढिलो आइपुग्ने र निर्यातसमेत प्रभावित हुने अवस्था देखेपछि मैले यो क्षेत्रमा लगानी गर्ने निर्णय गरेको हुँ।’ उनले कोभिड–१९ महामारीकै समयमा डाक्टरी पेसासँगै उद्योग स्थापना गर्ने निर्णय लिएको पनि बताए।
उद्योगमा कोरियाली रोबोटिक ल्याब, टर्कीका अत्याधुनिक टेक्सटाइल मेसिन, जर्मनी र ताइवानका औद्योगिक उपकरण तथा अन्तर्राष्ट्रिय मापदण्डअनुसारको गुणस्तर परीक्षण प्रणाली जडान गरिएको उनले जानकारी दिए।
उनका अनुसार उद्योगमा उत्पादित कपडाको रङ सजिलै नजाने भएकाले गुणस्तरमा विशेष ध्यान दिइएको छ।
-1746009348.jpg)
