माउन्टेन हेलिकप्टर कम्पनीले स्थलगत नाकाको प्रयोग गरेर चीनबाट हेलिकप्टर आयात गरेको छ।
बुधबार साँझ तातोपानी भन्सार नाकामा ल्याइएको हेलिकप्टर अहिले भन्सार जाँचपासको प्रक्रियामा रहेको हेलिकप्टर कम्पनीका कर्पोरेट म्यानेजर रामचन्द्र भुसालले बताए।
उनले उडाएर ल्याउन भन्दा सहज स्थलगत मार्गबाट ल्याउन भएको कारण लरीमा राखेर ल्याइएको प्रतिक्रिया दिएका छन्।
'उडाएर ल्याउँदा भन्दा स्थलमार्गबाट ल्याउन सहज भएको कारण लरीको सहायतामा ल्याइएको हो, सहजै भयो,' भुसालले भने।
चीनको सान्छी प्रान्तबाट ल्याइएको हेलिकप्टर तातोपानी आइपुग्न सात दिनको समय लागेको भुसालले बताए। यसकाे फ्रान्सको एयरबस कम्पनीमा निर्मित यो हेलिकोप्टर चीनको सान्छी ह्वाउतुफाङ्क टेक्नोलोजी प्रा.लिबाट खरिद गरिएको हो।।
तातोपानी नाकाबाट भने काठमाडौं उडाएर ल्याउने तयारी गरिएको छ।
'अहिले भन्सार जाँचपासको क्रममा नै छ। हामीले काठमाडौंसम्म नै स्थलमार्गबाट ल्याउने तयारी गरेका थियौ। तर नेपाल तर्फको बाटो अलि अप्ठ्यारो भएको कारण सबै प्रक्रिया पूरा गरेपछि उडाएर ल्याउछौँ,' भुसालले भने।
तातोपानी नाकाका भन्सार अधिकृत सूर्यप्रसाद काफ्लेले पहिलो पटक यो नाकाबाट हेलिकप्टर आयात भएको बताए।
-1746009348.jpg)
