बचत तथा ऋण कारोबार गर्ने सहकारी संस्थाले ६० दिनभित्र सहकारी नियमन प्राधिकरणमा दर्ता अभिलेखीकरण गर्नुपर्ने भएको छ।
प्राधिकरणले हालै संशोधित दर्ता अभिलेखीकरण मापदण्ड २०८२ लागू गर्दै दर्ता नगर्ने सहकारीलाई कारबाही गर्ने चेतावनी दिएको हो।
यससँगै ३० प्रतिशतभन्दा बढी बचत तथा ऋण कारोबार गर्ने सहकारीले दर्ता अभिलेखीकरण गर्नैपर्ने भएको छ। प्राधिकरणले सहकारीलाई पारदर्शी र उत्तरदायी बनाउन दर्ता अभिलेखीकरणलाई अनिवार्य बनाएको हो।
दर्ता गर्दा १ हजारदेखि १५ हजार रुपैयाँसम्म शुल्क लाग्नेछ। विवरण रुजु भएपछि प्राधिकरणले विद्युतीय प्रणालीमार्फत सञ्चालन इजाजतपत्र जारी गर्नेछ।
तर संघ, प्रदेश वा स्थानीय सरकारले समस्याग्रस्त घोषित गरेका सहकारी संस्थालाई भने दर्ता प्रक्रियामा समावेश नगरिने भएको छ। दर्ता भएका सहकारीले हरेक वर्ष साउन मसान्तभित्र इजाजतपत्र नवीकरण गर्नुपर्ने व्यवस्था छ।
दर्ता गर्दा पेश गर्नुपर्ने विवरणहरू
सहकारीको नाम, ठेगाना, सम्पर्क, दर्ता मिति, दर्ता कार्यालय
कर्मचारी संख्या, सेयर सदस्य संख्या, कुल सेयर रकम
वेबसाइट र सफ्टवेयर विवरण
विनियम र नीति, सञ्चालक तथा लेखा समिति पदावधिसहित
प्रमुख कार्यकारी वा व्यवस्थापकको शैक्षिक योग्यता, अनुभव
सेवा केन्द्र र कार्यक्षेत्रको विवरण
सेयर पुँजी, जगेडा, जोखिम भारित सम्पत्ति, पूँजीकोष
ठूला १०० सेयर सदस्य र १०० ऋणी सदस्यको विवरण
कर्जा, निक्षेप, निष्क्रिय कर्जा, पुनर्तालिकाकृत ऋण
वित्तीय विवरण, नाफा–नोक्सान, लेखापरीक्षण प्रतिवेदन
पछिल्ला दुई वर्षका साधारणसभा र सञ्चालक बैठकको विवरण
संघहरूसँगको आवद्धता र कार्यकारी प्रमुखको स्वघोषणा
-1746009348.jpg)
