उद्योगमन्त्री अनिल सिन्हाले निजी क्षेत्रका लागि सकारात्मक वातावरणको अभाव रहेको बताएका छन्।
नेपाल उद्योग वाणिज्य महासंघको आर्थिक बहसमा उनले कानुन बनाउने, रोक्ने र फेरि खोल्न अर्को कानुन बनाउने प्रवृत्तिले अर्थतन्त्रलाई चलायमान हुन नदिएको बताए।
'वास्तवमै सरकारले निजी क्षेत्रका लागि एउटा सकारात्मक वातावरण र प्लेटफर्म बनाइदिनु पर्नेमा त्यसको अभाव छ,' मन्त्री सिन्हाले भने।
उनले कानुन निर्माणमा नियन्त्रणको सोच हावी हुँदा अर्थतन्त्र माथि–तल भइरहेको, साना सरकारी निर्णयले गति अवरूद्ध भएको र मन्त्रालयबीच समन्वयको कमीले प्रस्तावहरू वर्षौंसम्म अड्किएको बताए।
उनले थपे, 'अर्थतन्त्रलाई नियन्त्रण गरेर चलायमान बनाउन सकिँदैन।'
अहिले अर्थतन्त्रको मुख्य समस्या नियन्त्रणमुखी नीति भएको उनको भनाइ छ।
'कानुन बनाउने अनि रोक्ने प्रवृत्तिले अर्थतन्त्र चलायमान हुन सकेको छैन, साना निर्णयले पनि गति रोकिएको छ। मन्त्रालयबीच समन्वय छैन, प्रस्ताव वर्षौं अड्किन्छ। अड्किएका कामले अर्थतन्त्र हातखुट्टा बाँधिएको जस्तो भएको छ,' सिन्हाले भने।
अड्किएका काम तत्काल फर्छ्यौट गर्ने, नियन्त्रण घटाउने, उत्तरदायी प्रणाली बनाउने, प्राथमिकताका आधारमा सुधार अगाडि बढाउने काम यो सरकारले गर्ने उनले बताए।
-1746009348.jpg)
