अर्थमन्त्री रामेश्वर खनालले निजी क्षेत्र माथिको आक्रमण ठिक नभएको बताएका छन्।
नेपाल आर्थिक पत्रकार संघ (नाफिज) को १६ औँ वार्षिक साधारण सभामा उनले यस्तो बताएका हुन्।
‘निजी क्षेत्रले तयार पारेको संरचना र सम्पत्ति नेपाली जनताको पनि हो। निजी क्षेत्रले निश्चित समयपछि छोड्ने नै हो। उनीहरूमाथिको आक्रमण ठिक होइन,' अर्थमन्त्री खनालले भने, 'निजी क्षेत्रको संरक्षण गर्नका लागि सबैले जोड दिनुपर्छ।'
विधि ठिक भएन भने सुधार गर्न सकिन्छ तर सहि मान्छेमाथि गलत कदम चालियो भने निरूत्साहित हुने समेत अर्थमन्त्रीको भनाइ छ।
‘यदि कसैले अपराध नै गरेको छ भने त्यसको सजाय दिनका लागि सरकार तयार छ। त्यसका लागि सडक, सामाजिक सञ्जाल र सञ्चार माध्यमबाट जथाभावी टिप्पणी गर्न हुँदैन’, अर्थमन्त्री खनालले भने।
जेनजी आन्दोलनबारे बोल्दै उनले यस आन्दोलनको उद्देश्य केवल आर्थिक समृद्धि नभई व्यापक भ्रष्टाचार अन्त्य र पारदर्शी सेवा प्रवाह सुनिश्चित गर्नु रहेकाले युवाहरूको मागलाई बेवास्ता गर्न नहुने बताए।
आगामी निर्वाचन अनिवार्य र समयमा नै हुनुपर्ने जिकिर गर्दै अर्थमन्त्री खनालले निर्वाचन सारिने कुनै पनि कदमले मुलुकलाई अनिश्चिततामा लैजाने बताए।
सुरक्षित, निष्पक्ष र भय–रहित वातावरणमा हुने चुनावले नेपालको अन्तर्राष्ट्रिय छवि मजबुत हुने विश्वास उनले व्यक्त गरे।
उनले सरकार सुधारका प्रक्रियामा लागिपरेको उल्लेख गर्दै अन्तर्राष्ट्रिय जगतमा नेपालबारे बनिरहेको सकारात्मक मूल्यांकन जोगाउन आगामी दिनमा अझ प्रभावकारी कदम चालिने बताए।
-1746009348.jpg)
