पाँच महिनामा एक खर्ब राजस्व उठाउने २० वस्तु, पेट्रोलियम गाडीको आयात बढ्यो

कस्ता गाडीमा कति प्रतिशत कर?

सेतोपाटी संवाददाता

काठमाडौं, पुस २०

यो वर्ष विभिन्न किसिमका गाडीको आयात बढेको छ। गाडीको आयात बढेकै कारण सरकारले उठाउने भन्सार राजस्वमा सुधार देखिएको छ।

सरकारले गाडी विशेषगरी कारहरूलाई विलासी वस्तुका रूपमा धेरै कर लगाउने गरेको छ। उच्च कर लगाइएका वस्तुको आयात बढ्दा समग्रमा भन्सार राजस्वमा सुधारमा सहयोग पुगेको भन्सार अधिकारीहरू बताउँछन्। विगतका वर्षहरूमा पेट्रोलियम जीप, कार र भ्यानको आयात निरन्तर घटेको थियो। तर यो वर्ष भने सुधार देखिएको छ।

त्यस्तै पेट्रोलियम पदार्थको मात्रात्मक आयात बढ्दा पनि भन्सार राजस्वमा सहयोग पुगेको छ। समग्र रूपमा गाडीबाट ३४ अर्ब ६४ करोड रुपैयाँ भन्सार राजस्व संकलन भएको छ। त्यस्तै डिजेल, पेट्रोल र खाना पकाउने ग्यासबाट ४१ अर्ब रुपैयाँ राजस्व संकलन भएको छ।

२० वस्तुको आयातमा भन्सार प्रशासनले भन्सार विन्दुमा लगाउने राजस्वबाट करिब एक खर्ब राजस्व संकलन भएको छ। जबकि यी वस्तुको आयात मूल्य भने २ खर्ब ८० अर्ब रुपैयाँ बराबरको मात्रै छ।

बढ्यो गाडीको आयात

चालु आर्थिक वर्षमा तयारी मोटरसाइकल र विद्युतीय जीप, कार र भ्यानको आयात घटे पनि समग्रमा गाडीको आयात बढेको छ।

विगतका वर्षहरूमा पेट्रोलियम जीप, कार र भ्यानको आयात घट्दो क्रममा थियो। चालु वर्षमा भने यस्तो गाडीको मात्रात्मक आयात ५२ प्रतिशतले र मूल्यगत आधारमा २८ प्रतिशतले बढेको छ। पेट्रोलियम जीप, कार र भ्यानमा औसत भन्सार राजस्व २४५ प्रतिशत छ। यो वर्ष ३ अर्ब ६१ करोड रुपैयाँका ३ हजार १७७ वटा यस्ता गाडीको आयात भएको छ। जसका कारण ८ अर्ब ९१ करोड रुपैयाँ बराबरको भन्सार महसुल, मूल्य अभिवृद्धिकर, अन्तःशुल्क, सडक दस्तुर, प्रदूषण कर लगायतका कर तथा शुल्क संकलन भएको छ।

अघिल्लो वर्ष यसै समयमा २ हजार ८४ वटा यस्ता गाडी २ अर्ब ८३ करोड रुपैयाँमा आयात भएको थियो। ७ अर्ब ७१ करोडको कर तथा शुल्क संकलन भएको थियो।

पेट्रोलियम जीप, कार र भ्यानको आयात बढे पनि यसै समयमा विद्युतीय जीप, कार र भ्यान भने गत वर्ष बराबर आयात भएको छैन। पाँच महिनाको अवधिमा मूल्यगत आधारमा यस्ता गाडीको आयात १९ प्रतिशतले घटेर ९ अर्ब ४ करोड रुपैयाँ बराबरको भएको छ। यी गाडीको आयातबाट ५ अर्ब ६० करोड रुपैयाँ बराबरको राजस्व संकलन भएको छ। अघिल्लो वर्षको यसै समयमा ११ अर्ब २७ करोड बराबरका यी गाडी आयात भएका थिए।

पेट्रोलियम जीप, कार र भ्यानमा औसत २४५ प्रतिशत भन्सार र अन्य कर तथा शुल्क लगाइने गरेकोमा विद्युतीय यस्ता गाडीमा ६४ प्रतिशत छ।

तयारी मोटरसाइकलको आयात पनि यो पटक घटेको छ। तर अनएसेंबल्ड मोटरसाइकलको आयात उल्लेख्य बढेको छ। पाँच महिनाको अवधिमा ६५ प्रतिशतले बढेर १२ अर्ब ४८ करोड रुपैयाँ बराबरको अनएसेंबल्ड मोटरसाइकल आयात भएको छ भने ११ अर्ब ७७ करोडको कर तथा महसुल संकलन भएको छ। यस्ता मोटरसाइकलमा औसत ९४ प्रतिशत कर तथा शुल्क लाग्ने गरेको छ।

तयारी मोटरसाइकलमा औसत भन्सार राजस्व १२७ प्रतिशत छ। चालु वर्षको पाँच महिनाको अवधिमा २ अर्ब रुपैयाँ बराबरको तयारी मोटरसाइकल आयातमा २ अर्ब ५६ करोड रुपैयाँ बराबरको राजस्व संकलन भएको छ।

अन्य गाडीहरूको आयात पनि बढेको छ।

सबैभन्दा धेरै भन्सार राजस्व उठ्ने प्रमुख वस्तुहरू

नाम	आयात मूल्य	भन्सार राजस्व
डिजेल	४५ अर्ब ६० करोड	१९ अर्ब ६६ करोड
पेट्रोल	२७ अर्ब ३३ करोड	१७ अर्ब ८४ करोड
मोटर साइकल(अन एसेम्वल्ड)	१२ अर्ब ४८ करोड	११ अर्ब ७७ करोड
जीप कार र भ्यानहरु	३ अर्ब ६३ करोड	८ अर्ब ९१ करोड
तयारी कपडा	१९ अर्ब ६६ करोड	६ अर्ब ८९ करोड
विधुतबाट संचालित जीप कार र भ्यानहरु	९ अर्ब ४ करोड	५ अर्ब ६० करोड
एल पि ग्यास	२२ अर्ब ३९ करोड	४ अर्ब १७ करोड
मोवाइल टेलिफोन	१९ अर्ब ४३ करोड	३ अर्ब ६२ करोड
शुद्ध फलाम	२१ अर्ब ८४ करोड	३ अर्ब ८ करोड
मोटर साइकल	दुई अर्ब १ करोड	दुई अर्ब ५६ करोड
डबल(क्याव पीकअप गाडी	एक अर्ब १९ करोड	दुई अर्ब १० करोड
भटमासको तेल कच्चा	४६ अर्ब ९७ करोड	एक अर्ब ८७ करोड
सुन	१६ अर्ब ३७ करोड	एक अर्ब ६३ करोड
अन्य बस ट्रकका चेसिसहरु	दुई अर्ब २३ करोड	एक अर्ब ३६ करोड
ट्रक, मिनी ट्रक	एक अर्ब ९८ कोड	एक अर्ब ३४ करोड
सिङ्गल(क्याव पीकअप गाडी	७४ करोड	९७ करोड
सुर्यमुखिको कच्चा तेल	७ अर्ब ६ करोड	९७ करोड
चाँदी	९ अर्ब १४ करोड	९१ करोड
टाइल	एक अर्ब १५ करोड	७४ करोड
तोरी, रायो, सर्स्र्यू तील	४ अर्ब ५२ करोड	७२ करोड
स्याउ, नास्पति र श्रिफल	४ अर्ब ५३ करोड	४४ करोड
मार्वल स्ल्याब	३३ करोड	२१ करोड
मुसुरो दाल	एक अर्ब २३ करोड	१२ करोड