लगानी बोर्ड नेपालले सेवा प्रवाहलाई छिटो, सरल र प्रभावकारी बनाउँदै राष्ट्रिय तथा अन्तर्राष्ट्रिय लगानीकर्तालाई थप आकर्षित गर्न भन्दै एकल विन्दु सेवा केन्द्र सञ्चालनका लागि गृहकार्य सुरू गरेको छ।
लगानी प्रक्रिया झन्झटिलो नहोस् भन्ने उद्देश्यसहित बोर्डले विभिन्न सरकारी निकायसँग समन्वय गर्दै तयारी अघि बढाएको जानकारी गराइएको छ।
एकल विन्दु सेवा केन्द्रको संयोजन गर्ने जिम्मेवारी बोर्डले सहसचिव हेमराज तामाङलाई दिएको उल्लेख छ।
केन्द्रमार्फत काम अघि बढाउन अख्तियारीसहित फोकल पर्सन तोक्ने क्रममा हालसम्म १४ वटा सरकारी निकायले आफ्ना प्रतिनिधि तोकेको जानकारी गराइएको छ।
ती निकायमा भूमि व्यवस्था, सहकारी तथा गरिबी निवारण मन्त्रालय, भौतिक पूर्वाधार तथा यातायात मन्त्रालय, वन तथा वातावरण मन्त्रालय, नेपाल राष्ट्र बैंक, अध्यागमन विभाग, आन्तरिक राजस्व विभाग, उद्योग विभाग, खानी तथा भूगर्भ विभाग, भन्सार विभाग, श्रम तथा व्यवसायजन्य सुरक्षा विभाग, विद्युत विकास विभाग, कम्पनी रजिष्ट्रारको कार्यालय तथा नेपाल दूरसञ्चार प्राधिकरण रहेका छन्।
बोर्डले तोकेका अन्य निकायहरूले पनि आवश्यकता अनुसार फोकल पर्सन तोक्न सक्ने उल्लेख छ।
लगानी बोर्डको कार्यालयले सम्बन्धित मन्त्रालय, विभाग तथा निकायहरूसँगको समन्वयमा एकल विन्दु सेवा केन्द्र सञ्चालनसम्बन्धी कार्यविधिको मस्यौदा तयार पारेको जानकारी गराइएको छ।
तत्कालका लागि सम्बन्धित मन्त्रालय तथा निकायका फोकल पर्सनसँग समन्वय गरेर काम अघि बढाइने बताइएको छ।
लगानी बोर्डका प्रमुख कार्यकारी अधिकृत सुशील ज्ञवालीले जेन-जी आन्दोलनका क्रममा बोर्डको कार्यालयमा आगजनी भएको र नयाँ कार्यालयको व्यवस्थापन तथा कार्यविधिले अन्तिम रूप पाएपछि एकै ठाउँबाट सेवा प्रवाह गरिने जानकारी गराए।
अटोमेसनमार्फत काम हुने भएकाले प्रविधिको प्रयोग महत्त्वपूर्ण हुने उनको भनाइ उल्लेख छ।
फोकल पर्सनहरूसँगको छलफलमा प्रमुख कार्यकारी अधिकृत ज्ञवालीले लगानीसम्बन्धी राष्ट्रिय लक्ष्य प्राप्ति र सुशासन कायम गर्न सबै निकायले अपनत्व लिएर काम गर्न अनुरोध गरेको जानकारी गराइएको छ।
लगानी बोर्डले सबैसँग समन्वय गरेर काम गर्ने र यसमा सबै निकायको साथ र सहयोग अपेक्षित रहेको उनको भनाइ रहेको उल्लेख छ।
विज्ञ रामकृष्ण सापकोटाले धेरै निकायबाट सेवा लिनु पर्दा लगानीकर्तालाई झन्झटिलो हुने अवस्था रहेको उल्लेख गर्दै एकल विन्दु सेवा केन्द्र कार्यान्वयनमा आएपछि लगानीकर्तासँग सम्बन्धित कामहरू चुस्त हुने जानकारी गराए।
हालका लागि फोकल पर्सनहरू सम्बन्धित मन्त्रालय तथा निकायको एकल सम्पर्क विन्दुका रूपमा रहने उल्लेख छ।
उनीहरूले लगानी बोर्डको कार्यालयबाट सिफारिस भई आएका आफ्ना निकायसँग सम्बन्धित काम सम्पादन गर्न सहजीकरण गर्ने जानकारी गराइएको छ।
लगानी बोर्डका सहसचिव हेमराज तामाङका अनुसार फोकल पर्सनहरूले सार्वजनिक निजी साझेदारी ऐन, सार्वजनिक तथा लगानी नियमावली र लगानी बोर्डको रणनीति तथा व्यावसायिक योजनाले तोकेका सेवा प्रवाहसम्बन्धी कार्यमा सहयोग पुर्याउने उल्लेख छ।
साथै, उनीहरूले लगानी बोर्डको कार्यालयबाट प्राप्त फाइल तथा पत्रमा समयमै राय र प्रतिक्रिया दिने, सम्बन्धित निकाय र लगानी बोर्डबीच पुलको भूमिका निर्वाह गर्ने तथा संस्थागत समन्वयकर्ताका रूपमा काम गर्ने जानकारी गराइएको छ।
-1746009348.jpg)
