नेपालका सबैभन्दा धनी १ प्रतिशतसँग कुल राष्ट्रिय सम्पत्तिको करिब २४.५ प्रतिशत रहेको विश्वव्यापी गैरसरकारी संस्था अक्सफामले सार्वजनिक गरेको रेजिष्टिङ द रूल अफ रिच प्रतिवेदनमा उल्लेख गरिएको छ।
यस प्रतिवेदन अनुसार विपन्न ५० प्रतिशत जनसंख्याको कुल राष्ट्रिय सम्पत्तिमा ५ प्रतिशतभन्दा कम हिस्सा छ।
प्रतिवेदनले देशको ठूलो जनसंख्या अझै खाद्य असुरक्षा, बेरोजगारी र न्यून आयको समस्यामा रहेको अवस्थामा धन र अवसर सीमित समूहमा केन्द्रित हुनु सामाजिक असन्तोष र राजनीतिक अस्थिरताको कारक बन्न सक्ने चेतावनी दिएको छ।
प्रतिवेदनले विश्वमा अत्यधिक धन केन्द्रीकरण जोखिमकै स्तरमा पुगेको र यसले लोकतन्त्र, नीति निर्माण र सामाजिक न्यायलाई कमजोर बनाइरहेको चेतावनी दिएको छ।
प्रतिवेदन अनुसार सन् २०२५ सम्म आइपुग्दा विश्वका अर्बपतिहरूको कुल सम्पत्ति १८३ खर्ब अमेरिकी डलर पुगेको छ, जुन इतिहासकै उच्चस्तर हो।
पछिल्लो एक वर्षमै अर्बपतिहरूको सम्पत्ति १६ प्रतिशतले बढेको अक्सफामले जनाएको छ।
यसबीच विश्वको झन्डै आधा जनसंख्या अझै गरिबीमा जीवनयापन गर्न बाध्य रहेको प्रतिवेदनमा उल्लेख छ।
पछिल्लो समय अत्यधिक आर्थिक शक्ति भएकाहरू राजनीतिक शक्तिमा रूपान्तरण हुँदै गइरहेको र यसले विश्वका धनी व्यक्तिहरूको नीति निर्माणमा सामान्य नागरिकको तुलनामा हजारौँ गुणा बढी पहुँच पुग्न थालेको उल्लेख गरेको छ।
धन मात्र होइन, शक्ति पनि धनीकै हातमा पुग्ने अवस्था बनिरहेको प्रतिवेदनले उल्लेख गरेको छ।
-1746009348.jpg)
