नेपाल उद्योग वाणिज्य महासंघका अध्यक्ष चन्द्रप्रसाद ढकालले बुढीगण्डकी जलाशययुक्त जलविद्युत आयोजना तत्काल अगाडि बढाउन सम्बन्धित पक्षलाई आग्रह गरेका छन्।
धादिङ उद्योग वाणिज्य संघले आयोजना गरेको १०औं धादिङ महोत्सवको उद्घाटन समारोहमा उनले लामो समयदेखि चर्चामा रहेको १२०० मेगावाट क्षमताको बुढीगण्डकी जलाशययुक्त जलविद्युत आयोजना अब ढिलाइ नगरी अघि बढाउनुपर्नेमा जोड दिए।
उनले नेपालभरका उद्यमी, व्यवसायी तथा लगानीकर्ताको लगानीमा नेपाल डेभलपमेन्ट पब्लिक लिमिटेड (एनडिपी) कम्पनी स्थापना गरिएको बताए।
आयोजनामा स्रोतको कमी भए निजी क्षेत्रको तर्फबाट यस कम्पनीमार्फत लगानी गर्न आफूहरू तयार रहेको उनको भनाइ छ।
नेपालमा जलविद्युत विकासको अपार सम्भावना रहेको बताउँदै ढकालले जलविद्युतको विकाससँगै खनिज, कृषि उत्पादन तथा अन्य व्यवसायिक सम्भावनालाई पनि अगाडि ल्याउन सहयोग पुग्ने बताए।
धादिङ जिल्लामा रहेका खनिज, कृषि तथा अन्य सम्भावनायुक्त क्षेत्रमा लगानी गर्न एनडीपी तयार रहेको पनि उनले उल्लेख गरे।
निजी क्षेत्रले कुनै पनि आयोजना तोकिएको समय, तोकिएको गुणस्तर र तोकिएकै बजेटभित्र सम्पन्न गर्ने गरेको ढकालले बताए।
'गत भदौको जेन–जी आन्दोलनका क्रममा निजी क्षेत्रका धेरै उद्योग, कलकारखाना, होटल तथा व्यवसायिक प्रतिष्ठानमा आगजनी र क्षति भयो। तर, निजी क्षेत्रले ती व्यवसाय मर्मत, सम्भार र पुनर्निर्माण गरेर सञ्चालनमा ल्याइसकेको छ,' उनले भने।
उनका अनुसार निजी क्षेत्रमाथि भएका धरपकड र व्यवसायमाथि गरिएको प्रहारले निजी क्षेत्र भयभित बनेको छ।
'निजी क्षेत्रले उत्पादन गरेको छ। पूर्वाधार निर्माण गरेको छ। सेवा दिएको छ। रोजगारी सिर्जना गरेको छ। राजस्व तिरेको छ। तर, निजी क्षेत्र किन सधैँ उपेक्षित छ?' उनले प्रश्न गरे।
स्थानीय स्तरमा आयोजना गरिने मेला–महोत्सवले स्थानीय उत्पादनको प्रवर्द्धन र बजारीकरणमा महत्त्वपूर्ण भूमिका खेल्ने ढकालले बताए।
यस्ता मेला–महोत्सवलाई महासंघले सधैँ प्राथमिकतामा राख्दै आएको उनको भनाइ छ।
'यस्ता मेला–महोत्सवले स्थानीय उत्पादन र सम्भावनाको प्रवर्द्धन गर्छन्। यसले स्थानीय आर्थिक गतिविधि विस्तार गर्न र रोजगारी सिर्जना गर्न सहयोग पुग्छ,' उनले भने।
-1746009348.jpg)
