गत आर्थिक वर्षको क्रियाकलापका आधारमा ४ वटा स्थानीय तहले विशिष्ट (८० प्रतिशत माथि) नतिजा प्राप्त गरेका छन्।
राष्ट्रिय प्राकृतिक स्रोत तथा वित्त आयोगको प्रतिवेदन अनुसार देशभरका ७५३ स्थानीय तहमध्ये कार्यसम्पादनमा ४ वटा स्थानीय तहले ८० प्रतिशत माथिको नतिजा निकालेका हुन्।
यी पालिकाहरूले नीतिगत अनुशासन, वित्तीय पारदर्शीता र सेवा प्रवाह गरी चारवटा सूचकमा उच्च अंक प्राप्त गरेका छन्।
अर्घाखाँचीको पाणिनी गाउँपालिकाले ८३.८४ अंक पाएको छ। कार्यसम्पादनको आधारमा यो देशभरमै प्रथम हुने पालिका हो।
नीतिगत समयसीमा यसले २५ मा २५ अंक पाएको छ। असार १० मा बजेट पेश, असार मसान्तभित्र पारित , प्रदेशलाई कर बुझाएको, आय-व्यय प्रक्षेपण र बजेट समीक्षा सबैमा यसले पूर्ण ५–५ अंक पाएको हो।
वित्तीय अनुशासनमा २७.३३ अंक पाएको छ। राजस्व परिचालन कुशलतामा पूर्ण १३ अंक र बेरुजु फर्स्यौटमा देशभरमै उच्च १४.२८६ अंक पाएको छ।
बजेट खर्चमा यो पालिकाले ९ अंक पाएको छ।
व्यवस्थित र लक्ष्यअनुसार बजेट खर्चमा धेरैजसो ठूला सहरले शून्य पाएको अवस्थामा यसले ९ अंक ल्याएर आफ्नो खर्च गर्ने क्षमता प्रमाणित गरेको छ।
रूकुम पश्चिमको चौरजहारी नगरपालिका ८२.१५ अंक प्राप्त गर्दै दोस्रो भएको छ।
यो नगरपालिकाको नतिजा मध्ये सबैभन्दा अघि स्वास्थ्य सेवामा छ। स्वास्थ्य सेवामा ९ मा ९ अंक पाएको छ। ४ पटक गर्भ जाँच, संस्थागत सुत्केरी र पूर्ण खोप गरी स्वास्थ्यका तीनै सूचकमा यसले पूर्णांक ३–३ अंक पाएको छ।
प्रशासनिक सक्रियता अन्तर्गत बजेट तर्जुमाका ५ वटै सूचक र राजस्व परिचालनमा पूर्ण अंक पाउनुका साथै बजेट खर्चमा ९.१५६ अंक प्राप्त गरेको छ।
वित्तीय सुशासन अन्तर्गत बेरुजु फर्स्यौटमा ९.७८ अंक हासिल गरेको छ। समग्रमा भने यो पालिकाले ८२.१५ अंक पाएको हो।
गुल्मीको मालिका गाउँपालिका ८१.९८ अंकसहित तेस्रो भएको छ। यो पालिका पनि बेरुजु नियन्त्रणमा उत्कृष्ठ देखिएको छ। यसले बेरुजु फर्स्यौटमा १३.३०१ अंक पाएको छ, जुन अत्यन्तै सकारात्मक हो।
समयमै बजेट ल्याउने र समीक्षा गर्ने कार्यमा पूर्ण अंक पाउनुका साथै खर्चको अवस्थामा ८.५७ अंक बटुलेको छ। शिक्षा र स्वास्थ्यमा विद्यार्थी भर्ना र संस्थागत सुत्केरी जस्ता सूचकमा पनि यसले राम्रो अंक जोडेको छ।
उत्कृष्ट चारमध्य चौथो स्थानमा रहेको गुल्मीकै धुर्कोट गाउँपालिकाले ८०.५२ अंक पाएको छ।
बजेट खर्चको अवस्थामा यसले उत्कृष्ट १०.४२५ अंक पाएको छ।
बेरुजु फर्स्यौटमा १२.४९९ अंक र राजस्व परिचालनमा पूर्ण १३ अंक पाएको छ। बजेटका सबै प्रक्रिया समयमै पुरा गरी २५ अंक पाएको हो।
-1746009348.jpg)
