उद्योग वाणिज्य महासंघका वरिष्ठ उपाध्यक्ष अन्जन कुमार श्रेष्ठले महासंघको ६०औं वार्षिक साधारण सभाका क्रममा आगामी नेतृत्व र आर्थिक एजेन्डाबारे स्पष्ट दृष्टिकोण प्रस्तुत गरेका छन्।
उनले भोलि हुने निर्वाचनपछि आफू अध्यक्षको जिम्मेवारी सम्हाल्ने बताउँदै यसलाई व्यक्तिगत अवसरभन्दा पनि देशभरका पाँच लाखभन्दा बढी उद्यमी–व्यवसायीको प्रतिनिधित्व गर्ने महत्वपूर्ण दायित्वको रूपमा लिएका छन्।
श्रेष्ठले निजी क्षेत्रलाई अर्थतन्त्रको मेरुदण्डका रूपमा उल्लेख गर्दै यसको योगदान करिब ८२ प्रतिशत अर्थतन्त्र र ८६ प्रतिशत रोजगारीमा रहेको बताए।
उनले निजी क्षेत्र सरकारको सहयात्री र साझेदार भएको उल्लेख गर्दै आगामी तीन वर्षमा सरकारसँग सहकार्य गरी उद्यमीहरूको हित, मनोबल वृद्धि र आर्थिक विस्तारमा केन्द्रित हुने प्रतिबद्धता जनाए।
उनका अनुसार नेपाल हाल अवसर र चुनौतीबीच उभिएको छ। बैंकिङ प्रणालीमा तरलता, विदेशी मुद्रा सञ्चिति र सुशासनप्रतिको प्रतिबद्धता सकारात्मक पक्ष भए पनि मध्यपूर्व संकट, घट्दो कर्जा प्रवाह र निजी क्षेत्रको कमजोर मनोबल चुनौतीका रूपमा रहेका छन्।
उनले दीर्घकालीन सोचको अभाव र राजनीतिक अस्थिरतालाई आर्थिक सुधार नहुनुको प्रमुख कारण बताए।
आगामी कार्यकालका लागि श्रेष्ठले निजी क्षेत्र र सरकारबीचको सम्बन्ध पुनःपरिभाषित गर्ने, लगानीमैत्री वातावरण निर्माण गर्ने, निजी सम्पत्ति र व्यवसायिक अधिकारको सुरक्षा सुनिश्चित गर्ने तथा विदेशी र स्वदेशी लगानी प्रवर्द्धन गर्ने योजना अघि सारे।
साथै, महासंघलाई केन्द्रदेखि जिल्लासम्म प्रभावकारी बनाउने र सदस्यहरूको आवाज सशक्त रूपमा उठाउने प्रतिबद्धता व्यक्त गरे।
उनले ६ स्तम्भ र ६० पहल समेटिएको विस्तृत कार्ययोजना ल्याउने जानकारी दिँदै तत्काल राहतसँगै दीर्घकालीन संरचनागत सुधारमा जोड दिए।
श्रेष्ठले महासंघलाई माग गर्ने संस्था मात्र नभई समाधानको साझेदार बनाउने लक्ष्य पनि व्यक्त गरे।
