भारतले चिनी निर्यातमा प्रतिबन्ध लगाएपछि नेपाल चिनी उत्पादक संघले मौज्दात पर्याप्त रहेको जानकारी गराएको छ।
संघले शुक्रबार विज्ञप्ति निकाल्दै चिनीको मौज्दात रहेको र मूल्य नबढाइएको जानकारी गराएको हो।
संघका अनुसार चालु क्रसिङ सिजनसम्म १३ वटा चिनी उद्योग सञ्चालनमा आई करिब १ लाख ९० हजार ८७० मेट्रिक टन चिनी उत्पादन भएको छ।
उत्पादनमध्ये केही नगन्य मात्रामा मात्र बिक्री भएको र हालसम्म करिब १ लाख ८ हजार मेट्रिक चिनी उद्योगमै मौज्दात रहेको संघले जनाएको छ।
त्यस्तै बजारमा व्यवसायीहरूसँग अनुमानित २० हजार मेट्रिक टन चिनी मौज्दात छ।
चालु आर्थिक वर्षको हालसम्म करिब ६०–७० हजार मेट्रिक टन चिनी आयात भएको पनि उल्लेख गरिएको छ।
खुला सीमाबाट हुने चिनी आयातको अभिलेख नरहने भएकाले आगामी क्रसिङ सिजनसम्म नेपालमा पर्याप्त मात्रामा चिनी उपलब्ध हुने संघको भनाइ छ।
स्वदेशमा पर्याप्त मौज्दात रहेकाले तत्काल कारखाना मूल्यमा कुनै उल्लेखनीय मूल्यवृद्धि नहुने पनि संघले प्रतिबद्धता गरेको छ।
भारतले चिनी निर्यातमा प्रतिबन्ध लगाए पनि आपूर्ति र उपलब्धतामा कमी नहुने आश्वासन दिँदै संघले अनावश्यक भण्डारण नगर्न सरोकारवालालाई अनुरोध गरेको छ।
