यो वर्ष पेट्रोलियम पदार्थको खपत निकै घटेको देखिएको छ।
फागुनपछि पेट्रोलियम पदार्थको मूल्य अत्याधिक बढेको कारण थप खपत घटेकोमा फागुन अघि पनि न्यून अपत देखिएको हो।
आर्थिक सर्वेक्षण २०८२/८३ फागुनसम्म सबै प्रकारका पेट्रोलियम पदार्थको खपत घटेको देखिएको छ।
उद्योग, वाणिज्य तथा आपूर्ति मन्त्रालयको तथ्यांक अनुसार पेट्रोल, डिजेल, हवाई इन्धन र एलपी ग्यासको बिक्री अघिल्लो वर्षको तुलनामा घटेको हो।
सबैभन्दा धेरै गिरावट मट्टितेलमा देखिएको छ। फागुनसम्म मट्टितेलको आयात ४७.७ प्रतिशतले घटेको छ।
पेट्रोलको बिक्री ६.४ प्रतिशतले घटेर ४ लाख ४१ हजार किलोलिटरमा सीमित भएको छ भने डिजेलको बिक्री ८.७ प्रतिशतले घटेर ७ लाख ८२ हजार किलोलिटर पुगेको छ।
हवाई इन्धन (एटिएफ) को बिक्री पनि ९.३ प्रतिशतले घटेको छ। एलपी ग्यासको खपत १०.४ प्रतिशतले घटेर ३ लाख २५ हजार मेट्रिक टनमा झरेको छ।
आयाततर्फ पनि सबै पेट्रोलियम पदार्थमा गिरावट देखिएको छ। पेट्रोल आयात १० प्रतिशत, डिजेल ९.९ प्रतिशत, एटिएफ ८.६ प्रतिशत र एलपी ग्यास ११.१ प्रतिशतले घटेको छ।
इन्धन खपतमा आएको गिरावटलाई आर्थिक गतिविधिको सुस्तता, वैकल्पिक ऊर्जाको प्रयोग वृद्धि र सीमित उपभोगसँग जोडेर हेरिन्छ।
