अर्थ मन्त्रालयले करदाता प्रोत्साहन कार्यक्रमअन्तर्गत १० लाख रूपैयाँको बम्पर उपहार पाउने एक जना र १ लाख रूपैयाँको उपहार पाउने एक जनाको नाम सार्वजनिक गरेको छ।
बम्पर उपहारस्वरूप १० लाख रूपैयाँ जित्ने कञ्चनपुर पुनर्वास नगरपालिकाका हेमराज जोशी हुन्।
उनलाई अर्थमन्त्री स्वर्णिम वाग्लेले फोन गरेर बधाई दिएका छन्।
विजेता जोशीले कञ्चनपुरकै शिवकृष्ण जेनरल स्टोर्सबाट सामान किनेका हुन्।
'हेमराजजी, बधाई छ। म संघीय सरकारको अर्थमन्त्री डा. स्वर्णिम वाग्ले बोलेको,' उनले भने, 'ल, तपाईंलाई बधाई छ। बिल लिने र बिल दिने बानी बसाल्न सरकारले सुरू गरेको प्रोत्साहन कार्यक्रममा तपाईंले बम्पर उपहारस्वरूप १० लाख जित्नुभयो। तपाईंलाई कर कार्यालयका साथीहरूले सम्पर्क गर्नुहुन्छ है।'
अर्थमन्त्रीको बधाई फोनपछि अकमक्क भएका जोशीले अर्थमन्त्रीलाई धन्यवाद दिएका थिए।
'धेरै धेरै धन्यवाद अर्थमन्त्रीज्यू,' १० लाख विजेता जोशीले फोनमा भने।
जोशीले गत साउन ७ गते २५० रूपैयाँ पर्ने सामान अनलाइन बैंकिङमार्फत क्युआर स्क्यान गरी खरिद गर्दा १० लाख रूपैयाँ जितेका हुन्।
त्यस्तै, अर्थमन्त्री वाग्लेले १ लाख रूपैयाँ विजेता रूपन्देहीकी सपना खरेललाई पनि बधाई दिएका छन्। खरेलले साउन ९ गते देवदह नगरपालिका मिलन चोकमा रहेको शुभसिद्धी सप्लायर्सबाट ९ सय रूपैयाँको तरकारी किनेकी थिइन्।
अर्थमन्त्री वाग्लेले जोशी र खरेल दुवैलाई अर्थ मन्त्रालय मातहतको आन्तरिक राजस्व विभागले सम्पर्क गरेर पुरस्कार जितेकोबारे विस्तृत जानकारी दिने पनि बताए।
त्यसै क्रममा उनले अन्य विजेतालाई पनि फोन सम्पर्क गरी बधाई दिने प्रयास गरेका थिए। तर सबैसँग फोन सम्पर्क हुन सकेन।
अर्थ मन्त्रालयमा पत्रकार सम्मेलन गरी अर्थमन्त्री वाग्लेले १५ जना १-१ लाख रुपैयाँका विजेता र १ जना १० लाख रुपैयाँ विजेता उपभोक्ता छनोट गरेका थिए। साउन १ देखि १५ गतेसम्म अनलाइनमार्फत वस्तु तथा सेवा खरिद गरेका तथा नगदमा कारोबार गरी विभागको प्रणालीमा बिल पेस गरेका उपभोक्ता यस कार्यक्रममा सहभागी थिए।
सरकारले घोषणा गरेको करदाता प्रोत्साहन कार्यक्रम यही साउन १ गतेबाट कार्यान्वयनमा आएको छ। अनलाइन माध्यमबाट वस्तु तथा सेवा खरिद गर्ने उपभोक्ता यो उपहार कार्यक्रममा स्वतः सहभागी हुने प्रणाली विकास गरिएको छ। तर वस्तु तथा सेवा खरिद गरेपछि भ्याट तथा प्यान बिल अनिवार्य रूपमा लिनुपर्ने हुन्छ।
नगदमा वस्तु तथा सेवा खरिद गरेका उपभोक्ताले भने सक्कल भ्याट तथा प्यान बिल लिएपछि त्यसलाई आन्तरिक राजस्व विभागको उपहार पोर्टल (https://prize.ird.gov.np/) मा गएर दर्ता गराउनुपर्छ।
सरकारले हरेक दिन एक जनालाई करकट्टी गरी १ लाख रूपैयाँ र प्रत्येक १५–१५ दिनमा २ जनालाई १०–१० लाख रूपैयाँ नगद प्रोत्साहन रकम उपलब्ध गराउनेछ।
उपहार हरेक महिनाको १६ गते र महिनाको अन्तिम दिन घोषणा हुनेछ। एक लाख रूपैयाँको कुल उपहार रकम १ लाख ३३ हजार ३३४ रूपैयाँ रहेको छ। त्यसमा २५ प्रतिशत करकट्टी गरेर विजेताले एक लाख नगद पाउने छन् भने १० लाख रूपैयाँको उपहारमा २५ प्रतिशत कर लाग्नेछ।
