संस्थागततर्फ सबैभन्दा बढी आयकर तिर्ने कम्पनी बनेको सूर्य नेपालका कर्पोरेट उपाध्यक्ष रवि केसीले मेहनत गरेर व्यवसाय गर्ने उद्यमीलाई सम्मान गर्ने परिपाटीले राजस्व वृद्धिमा योगदान पुगेको बताएका छन्।
कर दिवसका अवसरमा मंगलबार अर्थमन्त्री स्वर्णिम वाग्लेबाट सम्मानित भएपछि केसीले यस्तो परिपाटीले व्यवसायीमा उत्साह थप्नुका साथै आपसी प्रतिस्पर्धा पनि बढाएको बताए।
उनले सरकारले उपभोक्तालाई बिल लिने र व्यवसायीलाई बिल दिने कार्यमा प्रोत्साहन गरेको विषयलाई सकारात्मक रूपमा लिएको बताए।
'पहिले उपभोक्ताले बिल लिएर के हुन्छ र भन्ने सोच राख्थे। व्यवसायीलाई पनि बिल दिन गाह्रो हुने अवस्था थियो। अहिले सरकारले बिल लिए पुरस्कार पाइन्छ भन्ने देखाएको छ,' उनले भने।
सरकारले करदातालाई सधैँ प्रोत्साहन गर्ने र कर प्रणालीलाई सरल बनाउँदै लैजानुपर्ने उनको सुझाव छ।
व्यवसायी पनि इमानदार भएर व्यवसाय सञ्चालन गर्नुपर्ने उनले बताए।
त्यस्तै, सरकारले उपलब्ध गराउने सुविधा, करसम्बन्धी कानुन र विभिन्न योजनाबारे व्यापक जनचेतना फैलाउनुपर्नेमा उनले जोड दिए।
आर्थिक वर्ष २०८१/८२ मा सबैभन्दा बढी आयकर तिरेबापत सूर्य नेपाल संस्थागततर्फ सम्मानित भएको हो।
कर दिवसका अवसरमा मंगलबार अर्थमन्त्री स्वर्णिम वाग्लेले कम्पनीका तर्फबाट कर्पोरेट उपाध्यक्ष केसीलाई सम्मान गरेका थिए।