एनसेल बिजनेसले नख्खु, ललितपुरमा सञ्चालनमा रहेको आफ्नो अत्याधुनिक डेटा सेन्टरले विश्व प्रतिष्ठित 'एएनएसआई/टिआइए–९४२–सी रेटेड ३ डिजाइन एन्ड कन्स्ट्रकटेड फसिलिटी सर्टिफिकेसन' को प्रमाणीकरण पाएको घोषणा गरेको छ।
यो अन्तर्राष्ट्रिय रूपमा मान्यता प्राप्त टिएर थ्री प्रमाणीकरणले एनसेल डेटा सेन्टरको विश्वसनीयता, सुरक्षा र गुणस्तरका उच्च मापदण्डहरूलाई थप उजागर गर्दछ।
इन्टिग्रेटेड डेटा सेन्टरका रुपमा समेत चिनिएको यो डेटा सेन्टर सरकारद्वारा सूचीकृत भएको नेपालकै पहिलो डेटा सेन्टर तथा क्लाउड सेवा पनि हो।
यो प्रमाणीकरणले एनसेल डेटा सेन्टरको डिजाइन रेटिङ थ्री को मापदण्डअनुसार रहेको पुष्टि गर्दछ।
जसले अत्यावश्यक र सम्वेदनशील कार्य सञ्चालन गर्नका लागि समानान्तर रूपमा मर्मत गर्न सकिने उच्च उपलब्धता, उच्च अतिरिक्तता र प्रतिकूलताबाट छिट्टै उठ्ने क्षमताका पूर्वाधार उपलब्ध रहेको सुनिश्चित गर्दछ।
अधिकतम अपटाइमका लागि डिजाइन गरिएको यो डेटा सेन्टर पूर्वनिर्धारित मर्मत वा आकस्मिक घटनाहरूको समयमा पनि बिना कुनै अवरोध सञ्चालनमा रहन सक्षम छ, र पूर्ण रूपमा अतिरिक्त विद्युत आपूर्ति, कुलिङ तथा नेटवर्क प्रणालीमार्फत लगभग ९९.९८२ प्रतिशत उपलब्ध रहन्छ।
यो मूल्यांकन तथा प्रमाणीकरण टेलिकम्युनिकेसन इन्डष्ट्री एसोसिएसन (टिआइए)बाट अधिकार प्राप्त अडिट र प्रमाणीकरण गर्ने संस्था डेटा सेन्टर मिडिया एलएलपिले गरेको हो।
'यो प्रमाणीकरण एनसेलका साथै नेपालकै लागि पनि एक कोशेढुंगा हो किनकि नेपालबाट डिजाइन एन्ड कम्स्ट्रक्टेड फसिलिटीमा यो टिआइएको प्रमाणीकरण प्राप्त गर्ने एनसेल डेटा सेन्टर पहिलो हो,' एनसेलका प्रमुख कार्यकारी अधिकृत माइकल फोलेले भने।
'हामी विश्वस्तरीय डिजिटल पूर्वाधार उपलब्ध गराउन प्रतिबद्ध छौँ, जसले स्थानीय व्यवसायहरूलाई विस्तार गर्न आत्मविश्वास दिन्छ र सरकारको डिजिटल रूपान्तरणको महत्वकांक्षालाई पनि योगदान पुर्याउँछ,' उनले भने, 'विभिन्न संवेदनशील क्षेत्रका ग्राहकहरूले अब नेपालमै होस्ट गरिएका सुरक्षित र सधैँ उपलब्ध सेवाहरूमा भरोसा गर्न सक्छन्, किनकि विश्वसनीयता त्यस्ता व्यवसायहरूका लागि अत्यावश्यक छ जसले सेवा अवरुद्ध हुने अवस्थाको परिकल्पना समेत गर्न सक्दैनन्।'
एनसेल डेटा सेन्टरले सूचना सुरक्षा र गोपनीयता सम्बन्धी उत्कृष्ट अन्तर्राष्ट्रिय अभ्यासका लागि आइएसओ २७००१ र आइएसओ २७७०१ मान्यता पनि प्राप्त गरिसकेको छ, जसले सुशासन, डेटा संरक्षण अनि जोखिम व्यवस्थापन प्रक्रियाहरूलाई थप बलियो बनाउँछ।
यसका साथै एनसेलले आइएसओ ९००१ र १४००१ मान्यता पनि प्राप्त गरिसकेको छ।
यसले कम्पनी सधैँ उच्च गुणस्तरीय सेवा प्रदान गर्न तथा वातावरणीय प्रभावलाई न्यूनतम राख्न सधैं प्रतिबद्ध रहेको स्पष्ट पार्दछ।
यो प्रमाणीकरणले एनसेल बिजनेसको क्षमतामा थप अभिवृद्धि भएको छ। यसले बैंक तथा वित्तीय संस्था, बीमा कम्पनीहरू, सरकारी निकाय, साना तथा मझौला उद्योग र ठूला व्यवसाय लगायतका सेवाग्राहीहरूलाई डिजिटल सेवा उपलब्ध गराउन अनि नियामकीय नियम कानुनको पालना गर्दै अत्यन्तै संवेदनशील सेवाहरू सुरक्षित एवं अत्यन्त भरपर्दो पूर्वाधारमार्फत उपलब्ध गराउन एनसेल बिजनेस दक्ष रहेको पुष्टि गर्दछ। यसका साथै यि प्रमाणीकरणले बैंकिङ कारोबार, इन्टरप्राइज रिसोर्स प्लानिङ प्लेटफर्महरू र अनलाइन सेवाहरू जस्ता महत्वपूर्ण प्रणालीहरूको डाउनटाइम अर्थात् निष्क्रिय रहने समयलाई न्यूनतम बनाउन मद्दत गर्नुका साथै अडिट र कम्प्लाएन्ससँग सम्बन्धित आवश्यकताहरूलाई सरल बनाउँछ।
रेटेड ३ डिजाइनले बिल्ट इन रिडन्डेन्सी, बलियो ब्याकअप प्रणालीहरू र मर्मत वा अप्रत्याशित घटनाहरूका बेला न्यूनतम अवरोध मार्फत व्यापार व्यवसायलाई निरन्तरता दिदै विपद् पुनःस्थापनालाई मजबुत बनाउँछ जसले व्यवसायिक संस्थाहरूलाई आउटेज, साइबर इन्सिडेन्ट वा प्राकृतिक विपत्तिका बेलामा पनि आफ्नो सेवा सञ्चालन कायम राख्न सक्षम बनाउँछ।
यो प्रमाणीकरणले नेपालको डिजिटल रूपान्तरणमा पनि योगदान गर्दछ।
यसले महत्वपूर्ण डेटाको सुरक्षित स्थानीय होस्टिङलाई सक्षम बनाएर डेटा सार्वभौमिकता बलियो बनाउँछ, विदेशी पूर्वाधारमा निर्भरता घटाउँछ र देशलाई उदीयमान डिजिटल हबको रूपमा अगाडि बढाउँछ।
