भैरहवामा गौतमबुद्ध अन्तर्राष्ट्रिय विमानस्थल निर्माणको काम चिनियाँ कम्पनीले गरिरहेको छ। उक्त कम्पनीले विमानस्थलको धावनमार्ग, ट्याक्सी वे, एप्रोन तथा टर्मिनल भवन निर्माणको काम गरिरहेको छ। ती काम अहिले सम्पन्न हुने क्रममा छन्।
एउटा विमानस्थलमा त्यसरी काम गरिरहेको त्यही कम्पनी अर्को विमानस्थलको त्यही संरचना निर्माणका लागि आव्हान भएको टेन्डरमा भने अयोग्य भएको छ।
नागरिक उड्डयन प्राधिकरण अन्तर्गत रहेको त्रिभुवन अन्तर्राष्ट्रिय विमानस्थलको क्षमता अभिबृद्धि आयोजनाले निकाले टेन्डरको प्राविधिक मूल्यांकनमा उक्त कम्पनी अयोग्य भएको हो।
उस्तै संरचना, भौतिक पूर्वाधारको मापदण्ड पनि उही सबै उस्तै भएर पनि प्राविधिक मूल्यांकनमा अयोग्य भएपछि नर्थवेष्ट सिभिल एभिएसन कन्स्ट्रक्सनले प्राधिकरण र मन्त्रालयमा उजुरी दिएको छ।
कम्पनीको टर्नओभर,आकार र साधानस्रोतका हिसाबले कम्पनी योग्य भएपनि मूल्यांकनमा फेल गरिएको कम्पनीको गुनासो छ।
कम्पनीले उजुरी दिएपछि अहिले ठेक्काको काम रोकिएको छ।
आयोजनाले सात कम्पनीबाट २ कम्पनीको प्राविधिक प्रस्तावमात्र योग्य ठहर गरेको थियो।
प्राधिकरणका प्रवक्ता त्रिलोचन पौडेलले भने परामर्शदाताले विभिन्न मापदण्डका आधारमा प्रस्ताव अस्वीकृत गरेको हुनसक्ने बताए।
'उक्त कम्पनीको उजुरी पछि अहिले वित्तीय प्रस्ताव खोल्ने काम रोकिएको छ। उजुरी पछि उक्त कम्पनीको प्राविधिक प्रस्ताव मूल्यांकनको रिभ्यू हुँदैछ होला' पौडेलले भने।
त्रिभुवन विमानस्थलको एप्रोन र ट्याक्सी वे विस्तारका लागि ८ अर्ब अनुमानित लागतमा आव्हान गरिएको उक्त ठेक्कामा ७ कम्पनीले भाग लिएका थिए। प्राधिकरणको मूल्यांकन समितिले यसमा २ कम्पनीलाईमात्र छनौट गरेको थियो। छनौट हुने पनि चिनियाँ कम्पनी नै रहेका छन्।
यसमा भैरहवा विमानस्थल निर्माण गरिरहेको नर्थवेस्ट सिभिल एभिएसन एअरपोर्ट कन्स्ट्रक्सन, युनान कन्स्ट्रक्सन एन्ड इन्भेस्टमेन्ट होल्डिङ,चाइना नेसनल एरोटेक्नोलोजी इन्टरनेसनल इन्जिनियरिङ कर्पोरेसन,चाइना स्टेट कन्स्ट्रक्सन इन्जिनियरिङ कर्प, सीएएमसीई-सीआरबीईजी जेभी,चाइना जेङसु इन्टरनेसनल इकोनोमिक एन्ड टेक्निकल कोअपरेसन र कोभेक-सीआईजीसी-टुन्डी जेभी सहभागी भएका थिए।
नर्थवेष्टले प्राधिकरणका अधिकारीहरुले दुई चिनियाँ कम्पनीसँगको मिलेमतोमा सिन्डिकेट कायम गर्न खोजेको आरोप लगाएको छ।
' प्राविधिक मूल्यांकनमा पास गरिदिएमा आर्थिक कबोलमा नर्थवेष्ट पर्नसक्ने सम्भावना बढी हुने डरले उनीहरुले हामिलाई पाखा लगाएका हुन्। यसमा ठूलो आर्थिक चलखेलको सम्भावना रहेको भन्दै हामिले मन्त्रीदेखि अन्य सरकारी निकायलाई जानकारी गराएका छौ' कम्पनी सम्बद्ध स्रोतले भन्यो।
स्रोतहरुका अनुसार सीएएमसीई-सीआरबीईजी जेभी र कोभेक-सीआईजीसी-टुन्डी जेभी मध्ये एक कम्पनीलाई ठेक्का दिने अन्तिम तयारी भइरहेको छ।
यो विषयमा प्राधिकरणका कुनै पनि अधिकारीले बोल्न मानेका छैनन्। उनीहरुले सार्वजनिक खरिद अनुगमन कार्यालयमा समेत उजुरी परेकाले अहिले बोल्न नमिल्ने बताउँदै आएका छन्।
