सरकारले कोरोनाभाइरसका कारण तहसनहस भएको पर्यटन क्षेत्रलाई उकास्न विभिन्न योजनाहरू ल्याएको छ।
बिहीबार आगामी वर्षको बजेट भाषण गर्दै अर्थमन्त्री युवराज खतिवडाले हरेक प्रदेशमा पर्यटन पूर्वाधार बनाउन १ अर्ब २६ करोड रुपैयाँ छुट्याइएको बताए। त्यस्तै होटल तथा एयरलाइन्सलाई कर तथा शुल्क छुट दिइनेछ।
कोरोना संक्रमणको जोखिम कम हुनेबित्तिकै नयाँ पर्यटकीय सेवा विकास गरिने खतिवडाले बताए।
उनले पर्यटन विश्वविद्यालय स्थापना लागि सम्भाव्यता अध्ययन गरिने र माध्यमिक तहभन्दा माथिको पाठ्यक्रममा पर्यटन समावेश गरिने बताए।
रारा ताल क्षेत्रको गुरुयोजना तयार गरिने र आन्तरिक पर्यटन प्रवर्द्धन गरिने खतिवडाले बताए।
‘कोरोनाभाइरसको संक्रमणको जोखिम सकिएपछि राष्ट्रसेवक कर्मचारी र अरू नागरिकलाई देश दर्शन गर्न प्रोत्साहन गरिनेछ,’ खतिवडाले भने।
