नागरिक उड्डयन प्राधिकरणले नेपाल वायुसेवा निगम (नेपाल एयरलाइन्स) का तीन पाइलटलाई कारबाही गर्न सिफारिस गरेको छ।
गत शुक्रबार नेपाल एयरलाइन्सको जहाज हङकङ विमानस्थलमा अवतरण गर्ने क्रममा एयर ट्राफिक कन्ट्रोल (एटिसी) को निर्देशन नमानेपछि नागरिक उड्डयन प्राधिकरणले तीन पाइलटलाई कारबाही गर्न एयरलाइन्सलाई सिफारिस गरेको हो।
हङकङ विमानस्थल एटिसीको निर्देशन नमानेर जोखिमपूर्ण अवतरण गरेको भन्दै पाइलटलाई कारबाही गर्न निर्देशन दिएको प्राधिकरणका प्रवक्ता जगन्नाथ निरौलाले बताए।
पाइलटहरू नरबहादुर विश्वकर्मा, राजेश कुशवाह र उद्धव घिमिरेलाई कारबाही गरिएकाे हाे।
'हङकङ विमानस्थल एटिसीको निर्देशन नमानेकाले त्यहाँको सिभिल एभिएसनले हामीलाई खबर गर्यो,' उनले भने, 'यसै आधारमा प्राधिकरणले तीन पाइलटलाई निलम्बन गर्न निगमलाई निर्देशन दिएका छौं।'
उनका अनुसार यसबारे थप प्रक्रिया वायु सेवा निगमले अगाडि बढाउने छ।
निगमले भने तीन पाइलटलाई कति समय निलम्बन गरिएको हो भन्नेबारे अहिले यकिन नभइसकेको जनाएको छ। क्यानले कारबाही गर्नू भनेसँगै उनीहरूलाई निलम्बन गरिएको तर यसबारे थप अध्ययन/अनुसन्धान बाँकी भएकाले अहिल्यै निधो नभइसकेको निगमका प्रवक्ता अर्चना खड्काले बताइन्।
निगमले घटनाबारे विस्तृत अध्ययन गरेर उनीहरूमाथिको कारबाही के कसरी अगाडि बढाउने भन्ने निर्णय गरिने उनको भनाइ छ।
-1746009348.jpg)
