सहरको भीडभाडबाट नजिकै, शान्त वातावरण र प्रकृतिसँग रमाउन चाहनेलाई लक्ष्य गर्दै ललितपुरको गोदावरीमा नयाँ होटल खुलेको छ।
'गोदावरी फरेस्ट होटल' सातदोबाटोबाट ८ किलोमिटरको यात्रामा पुग्न सकिन्छ। यो चारतारे डिलक्स होटल गोदावरी बसपार्क पुग्नुभन्दा करिब सय मिटर अगाडि नै छ।
गोदावरी जंगलको बीचमा रहेको यो होटलले अन्तर्राष्ट्रिय स्तरको आतिथ्य सेवा दिने होटलका अध्यक्ष विजय मल्लले बताए।
राति बस्न सकिने (नाइट डेस्टिनेसन) गन्तव्यका रूपमा गोदावरीलाई विकास गर्ने उद्देश्यले यहाँ लगानी गरिएको उनी बताउँछन्।
'गोदावरी पुरानो पर्यटकीय गन्तव्य हो। मानिसहरू दिउँसो घुम्न आउँछन्,' उनले भने, 'तर यहाँ बास बस्न सुविधाजनक र स्तरीय होटल छैनन्। त्यसैले यहाँ पहिलो चारतारे होटल खोलेका हौं।'
यो होटलले काठमाडौं नजिकै प्रकृति र लक्जरीको संयोजनसहित नयाँ पर्यटकीय गन्तव्यका रूपमा आफूलाई स्थापित गर्न खोजेको उनले बताए।
'होटल खुलेको तीन महिना भयो,' उनले भने, 'युरोपियन, अमेरिकन र नेपाली ग्राहकले सेवा लिइरहेका छन्।'
होटलको मुख्य विशेषता वरिपरिको जंगलको दृश्य नै हो। जंगलमा दुई सयभन्दा बढी प्रजातिका चरा पाइने उनले विजयले बताए।
'चराको आवाजले मन शान्त हुन्छ,' उनले भने, 'लक्जरियस सुविधा सहित शान्त वातावरणमा रमाउने प्रकृतिप्रेमी ग्राहकलाई लक्ष्य गरेर होटलको डिजाइन गरिएको छ।'
विजयका अनुसार होटलको व्यवस्थापन अमेरिकी ब्रान्ड बेस्ट वेस्टर्नले सम्हालेको छ।
होटलमा स्वीट, डिलक्स र एक्जुकेटिभ गरी तीन प्रकारका ८३ वटा कोठा छन्। यिनमा तीन वटा स्वीट, १९ वटा डिलक्स र बाँकी एक्जुकेटिभ हुन्।
सहर र जंगल दुवै दृश्य देखिने गरी कोठाहरूको डिजाइन गरिएको छ। खाना तथा खाजाका लागि दुइटा रेस्टुरेन्ट छन्।
होटल भवनको सबभन्दा माथिल्लो भागमा बार तथा रेस्टुरेन्ट भएकाले ग्राहकले राति झिलिमिली सहरको दृश्य देख्न सक्ने उनले बताए।
यहाँ स्विमिङ पुल, ज्याकुजी (तातो पानी हुने बाथटब), स्पा र हेल्थ क्लब र चिल्ड्रेन पार्क छ।
सेमिनार तथा गोष्ठीका लागि ४० देखि दुई सय जना मानिस अट्ने क्षमताका चार वटा हल छन्। ग्राहकले आवश्यकता अनुसार हल लिन सक्छन्।
होटलबाट मार्बल डाँडा, फूलचोकी तथा बोटानिकल गार्डेन पदयात्रा गर्न पनि सकिन्छ।
'विदेशी ग्राहकका लागि तीन–चार दिनको प्याकेज बनाउँछौं,' उनले भने।
गोदावरी फरेस्ट होटल कुल दस रोपनी क्षेत्रफलमा फैलिएको छ। तीन रोपनीमा होटलको संरचना बनाइएको छ। बाँकी भागमा पार्किङ र हरियाली वातावरण बनाइएको छ।
विजयका अनुसार होटलमा ५० जनाभन्दा बढीले रोजगारी पाएका छन्। कर्मचारी सबै नेपाली हुन्।
होटलमा उपभोग हुने तरकारी, फलफूल तथा दूधजन्य पदार्थ पनि स्थानीय स्तरबाटै किनिने उनले बताए।
'स्थानीय उत्पादन र रोजगारीलाई प्राथमिकता दिएका छौं,' उनले भने।
यो होटल २०७५ सालदेखि बनाउन सुरू गरिएको थियो। तर विश्वव्यापी रूपमा फैलिएको कोभिड महामारीका कारण समयमा सम्पन्न हुन नसकेको होटलका सञ्चालक सदस्य राजेन्द्र भण्डारीले बताए।
'चार वर्षमा सञ्चालनमा ल्याउने लक्ष्य थियो,' उनले भने, 'तर कोभिड र प्राकृतिक प्रकोपले गर्दा ६ वर्ष लाग्यो।'
होटल समयमा सम्पन्न नहुँदा १० प्रतिशत लगानी थपिएको उनले बताए। हालसम्म होटलमा एक अर्ब ६० करोड रूपैयाँ लगानी भइसकेको छ।
आगामी दिनमा सर्वसाधारणका लागि होटलको सेयर (आइपिओ) जारी गर्ने योजना छ। लगानी थपेर लगानी फिर्ता (पे–ब्याक) अवधि छोट्याउने लक्ष्य पनि रहेको उनले जानकारी दिए।
आगामी दिनमा होटल स्तरोन्नति गरेर पाँचतारे बनाउने योजना भएको राजेन्द्रले बताए।
'हामीसँग अहिले रूम थोरै छन्। आगामी दिनमा स्वीट रूम, डिलक्स रूम तथा क्यासिनो थप्नेछौं,' उनले भने, 'बिहे, ब्रतबन्ध लगायत शुभकार्यका लागि एक हजार जनाभन्दा बढी मानिस अट्ने क्षमताको हल पनि थप्नेछौं।'
-1746009348.jpg)
