कुनै कुनै देशमा मान्छेले
नुहाउनसम्म पाएका छैनन्
तर मेरो देश
त्यस्तो देश हो
जुन देश प्रत्येक दिन बिहान
चिसो पानीले
शिरदेखि पाउसम्म स्नान गर्दछ।
मेरो देशका अंग अंगहरूमा
प्रकृतिको शुद्ध जल बगिरहेको छ
र मेरो देशका नशा नशाहरूमा
वीरहरूको रगत बगिरहेको छ।
स्वर्गमा बसिरहेका भगवान छन् नि
ती भगवान पनि
कुनै दिन मेरो देशका नागरिक थिए
यसैले मेरो देश
भगवानको देश हो।
सायद एकदिन आउनेछ यो विश्व
लखर लखर
भगवान खोज्दै मेरो देशमा
म त्यही दिन देखाउने छु
यो विश्वलाई
भगवान बुद्ध र माता सीता
अनि देखाउने छु
यो विश्वलाई भगवानको घर
सत्यवती, तपोवन, मुक्तिसोपान हुँदै
देशहरूको देश मेरो नेपाल
तर एउटा कुरा म कसरी भनूँ?
मेरो देशका अंग-अंगहरूमा
आज असुरहरूको हैकम छ।
दर्जनौँदेशबाट
एउटा भएको मेरो देश
देशमात्र होइन
देशहरूको पनि देश हो
तर
देशहरूको देश
मेरो देश
आज देशमा छैन
देशहरूको देश
मेरो देश त
आज तपाईंहरूको काँधमा छ
अब जे गर्नु हुन्छ गर्नुस्।
