चीनले हङकङमा राष्ट्रिय सुरक्षा कानुन लागू गरेकै दिन सोही कानुनअन्तर्गत एक जनालाई पक्राउ गरेको छ। बुधबार हङकङलाई स्वतन्त्र बनाउनु पर्ने मागसहित प्रदर्शन गर्न निस्किएका एक जनालाई प्रहरीले पक्राउ गरेको हो।
उनले हङकङलाई स्वतन्त्र बनाउनु पर्ने लेखिएको ब्यानर बोकेका थिए भने 'फ्री हङकङ'को लुगासमेत लगाएका थिए।
'हङकङ कजवेबेमा स्वतन्त्र हङकङको झण्डा बोकेका एक पुरूषलाई राष्ट्रिय सुरक्षा कानुनको उल्लंघन गरेको अभियोगमा पक्राउ गरेको छ,' हङकङ प्रहरीले आफ्नो ट्वीटरमा लेखेको छन्,' कानुन लागू भएदेखि यता प्रकाउ पर्ने पहिला व्यक्ति हुन्।'
बुधबार बेलायतले हङकङ चीनलाई बुझाएको २३ औं वार्षिकोत्सव हो। चीनलाई हङकङ बुझाउँदा कम्तिमा पनि ५० वर्षसम्म स्वतन्त्रताको अधिकार दिने सम्झौता भएको थियो।
उक्त सम्झौताविपरीत चीनले राष्ट्रिय सुरक्षा कानुन कार्यान्वयनमा ल्याएपछि त्यसको विरोध भइरहेको छ। केही स्थानमा प्रदर्शन गर्न निस्किएका प्रदर्शनकारीमाथि प्रहरीले पेपर स्प्रेसमेत हानेको छ।
जुलाई १ मा हङकङमा सधैजसो विशाल प्रदर्शन हुने गरेका थियो। तर कोरोनाभाइरसको महामारीका कारण प्रदर्शन गर्न बेइजिङले प्रतिबन्ध लगाएको हो। अहिले हङकङमा ५० जना भन्दा बढी भेला हुन नपाइने नियम ल्याइएको छ। यद्यपी प्रदर्शनकारीहरूले हरेक वर्ष प्रदर्शन गर्दै आएको भन्दै आज साँझ पनि प्रदर्शन गर्ने बताएका छन्।
'हामी हरेक वर्ष प्रदर्शन गर्छौं... र हामी प्रदर्शन गर्दै गर्छौं,' स्वतन्त्रता चाहने एक अभियान्ताले रोयटर्ससँग भने।
आजदेखि लागू भएको राष्ट्रिय सुरक्षा कानुनले विदेशी शक्तिसँग मिलेर अलग हुन खोज्ने, तोडफोड गर्ने र आतंकवादको काम गरे तीन वर्षदेखि जन्मकैद सम्मको सजाय तोकेको छ।
सन् २०१९मा भएको आन्दोलनमा प्रदर्शनकारीहरूले शहरको भौतिक संरचनामा क्षति पुर्याएका थिए। नयाँ कानुनले भने सार्वजनिक सम्पत्तिको तोफफोड गर्ने कार्यलाई आतंकवाद ठानेको छ।
बेइजिङले हङकङमा एकलौटी ढंगले सुरक्षा कानुन लागु गरेको भन्दै बेलायत र अमेरिकालगायत शक्ति राष्ट्रले चर्को विरोध गरेका छन्।