प्रधानमन्त्री सुशीला कार्कीको निमन्त्रणामा तीन दलका शीर्ष नेता शनिबार बालुवाटारमा उपस्थित थिए।
नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली र नेपाली कम्युनिस्ट पार्टीका संयोजक पुष्पकमल दाहाल 'प्रचण्ड' अपराह्न पौने ४ बजे बालुवाटार पुगेका थिए।
बालुवाटार स्रोतका अनुसार प्रधानमन्त्रीले बोलाएको शनिबारको छलफलको सुरूआत सञ्चारमन्त्री जगदिश खरेलले गरे।
मन्त्री खरेलले सबभन्दा पहिले एमाले अध्यक्ष ओलीलाई बधाइ दिए, 'तपाईंहरूले सफलतापूर्वक महाधिवेशन सम्पन्न गर्नुभयो, यहाँहरूलाई हार्दिक बधाइ।'
मन्त्री खरेलले अब बधाइ दिने पालो थियो कांग्रेस सभापति देउवालाई।
जेनजी आन्दोलन क्रममा आक्रमणमा परेर घाइते भएका देउवा 'रिकभर' भएर आएको र पार्टीलाई फेरि चलायमान बनाएको भन्दै खरेलले देउवाको तारिफमा केही शब्द खर्चिए।
देउवापछि मन्त्री खरेलले नेकपा संयोजक प्रचण्डलाई पनि बधाइ दिए। धेरै दलहरू मिलाएर एकै दल बनाएकोमा उनले प्रचण्डलाई बधाइ दिए।
त्यसपछि मन्त्री खरेलले आफ्ना कुरा राख्न भन्दै ओलीलाई आग्रह गरे। ओलीले भने पहिले प्रधानमन्त्रीका कुरा सुन्ने भन्दै सुशीला कार्कीतर्फ संकेत गरे। त्यसपछि प्रधानमन्त्री कार्कीले आफ्ना कुरा राखिन्।
त्यस क्रममा प्रधानमन्त्री कार्कीले आफ्नो निमन्त्रणा स्वीकार गरी उपस्थित भएकामा तीन नेताहरूलाई धन्यवाद ज्ञापन गरिन्।
सरकारले राष्ट्रपतिबाट प्राप्त कार्यादेश अनुसार चुनाव गराउन तयारी तीव्र पारिरहेको बताइन्।
'यो घर तपाईंहरूकै हो। म त न्याय क्षेत्रको मान्छे। राष्ट्रपतिज्यूबाट चुनाव गराउने कार्यादेश पाएबमोजिम हामी चुनावको तयारी गरिरहेका छौं,' उनले शीर्ष नेताहरूसँग भनिन्।
प्रधानमन्त्री कार्कीले चुनावमा पूरै होमिन रक्षाबाहेक आफूसँग राखेका अरू मन्त्रालय पनि अन्य मन्त्रीलाई जिम्मा लगाइसकिएको बताइन्।
त्यस कारण निर्वाचन सफल पार्नुपर्ने विषयमा छलफल गर्न आफूले नेताहरूलाई बोलाएको प्रधानमन्त्री कार्कीले बताइन्।
'मैले यहाँहरूलाई बोलाएर बिन्ती गर्न खोजेको के भने यो निर्वाचन जसरी पनि सफल पारौं। सबै यसमा सहभागी हुनुपर्छ। तपाईंहरू निर्वाचनका लागि तयारै हुनुहुन्छ भन्ने नै मैले देखेकी छु। त्यस्तो वातावरण बनिरहेको देख्छु। यो स्वागतयोग्य छ,' प्रधानमन्त्री कार्कीले दलका नेताहरूलाई भनिन्।
निर्वाचन आयोग र प्रहरी प्रशासनलाई पनि भनेजति नै स्रोतसाधनको व्यवस्था गरेको प्रधानमन्त्री कार्कीले बताइन्।
'सुरक्षाकर्मीको मनोबल बढेको कुरा त यहाँहरूले पनि महसुस गर्नुभएकै होला। हामी त्यसरी काम गरिरहेका छौं। अब कुनै अलमल नगरी यो राष्ट्रको भविष्य सम्झेर, स्थिर र दिगो लोकतन्त्रको सुनिश्चितताका लागि चुनाव सफल पारौं। यो हामी सबैको जिम्मेवारी हो। यत्ति अनुरोध गर्न मैले यहाँहरूलाई आज निम्ता गरेकी हुँ,' प्रधानमन्त्री कार्कीको भनाइ थियो।
प्रधानमन्त्रीले आफ्ना कुरा राखेपछि एमाले अध्यक्ष ओली बोल्न थाले।
उनले सुरूमै जेनजी आन्दोलन 'आन्दोलन' नभई विध्वंश मात्रै भएको पूर्वधारणा दोहोर्याए।
'त्यो कुनै आन्दोलन थिएन, केवल विध्वंश थियो,' ओलीको भनाइ उद्धृत गर्दै बालुवाटार स्रोतले भन्यो, 'त्यसपछि उहाँले यसअघि भन्दै आएका सबै कुरा दोहोर्याउनुभयो। चुनाव सम्भव छैन भन्नेदेखि संसद पुनः स्थापनाका कुरामा उहाँको जोड थियो। सुरक्षा व्यवस्थाप्रति शंका उठाउनुभयो। यति भनेर पनि ओलीले एमाले चुनावबाट चाहिँ नभाग्ने बताउनुभयो।'
ओलीले यति भने लगत्तै देउवाले रोक्न खोजे।
'हत्तेरी, चुनावमा जाने भनेपछि भइगो त,' ओलीलाई रोक्दै देउवाले भने, 'कति त्यही कुरा गर्या यार! सेना परिचालन भइसकेको छ त। सेना परिचालन चुनावकै सुरक्षाका लागि त हो नि!'
प्रचण्डले पनि थपे, 'शीतल निवासमा यसबारे कुरा भएको छ कमरेड। अब थप विषयमा कुरा गरौं।'
बालुवाटार स्रोतका अनुसार ओलीले फेरि त्यही कुरा झिक्न खोज्दै थिए, देउवाले रोकिहाल्थे।
'आजको बैठकमा ओली बोल्न खोज्ने, देउवाले रोक्ने क्रम पटक पटक चल्यो,' स्रोतले भन्यो।
शनिबारको शीर्ष बैठकमा सबभन्दा महत्त्व पाएको विषय चाहिँ समानुपातिक उम्मेदवारको बन्द सूची बुझाउने मिति सार्नुपर्ने बारे थियो।
नेकपा संयोजक प्रचण्डले आफ्नो दलमा असहज नभए पनि अन्य दलका लागि सहज बनाउन पाँच दिन म्याद थप्नुपर्ने बताए।
देउवाले पनि यो विषयमा कांग्रेसमा समस्या रहेको भन्दै म्याद थप्न ठिक हुने बताए।
ओलीले भने एमालेमा कुनै समस्या नभएको र आफूले तत्काल मिलाइहाल्ने बताएका थिए।
फागुन २१ को प्रतिनिधिसभा निर्वाचनका लागि समानुपातिक उम्मेदवारको बन्दसूची बुझाउन निर्वाचन आयोगले दलहरूलाई पुस १३ र १४ गते समय दिएको छ।
-1756794700.JPG)
-1746009348.jpg)
