इजरायलका प्रधानमन्त्री बेन्यामिन नेतन्याहु गुप्तचरका प्रमुखलाई लिएर सुटुक्कै साउदी अरेबिया गएका छन्।
इजरायल र साउदी अरबले उनको भ्रमणबारे आधिकारिक जानकारी दिएका छैनन् तर इजरायलका सञ्चार माध्यमले प्राइभेट जहाज लिएर नेतन्याहु र गुप्तचर संस्था मोसदका प्रमुख योसी कोहेन आइतबार साउदी अरबको तटीय शहर नियोम पुगेको समाचार प्रकाशन/प्रसारण गरेका छन्।
नियोममा नेतन्याहुले साउदी अरबका युवराज मोहम्मद बिन सलमान र साउदी भ्रमणमा रहेका अमेरिकी विदेश मन्त्री माइक पोम्पेओलाई भेटेको समाचारमा उल्लेख छ।
फ्लाइट राडारको तथ्यांकबाट इजरायली मिडियाले नेतन्याहुको भ्रमणबारे जानकारी लिएका हुन्।
अरब संसारको शक्ति राष्ट्र साउदी अरब र यहुदी बाहुल्य रहेको इजरायलबीच औपचारिक सम्बन्ध छैन।
पछिल्लो समय इजरायलले अरब मुलुकहरूसँग सम्बन्ध सुधार्न खोजिरहेका छन्।
संयुक्त अरब इमिरेट्स र बहराइनले इजरायलसँग औपचारिक सम्बन्ध स्थापित गर्ने भइसकेका छन्।
पछिल्लो समय साउदी अरबले पनि इजरायलसँग सम्बन्ध स्थापित गर्न सकिने बताएको छ।
