नेकपा एमाले सांसद योगेश भट्टराईले शान्ति प्रक्रिया प्रधानमन्त्रीको मागी खाने भाँडो भएको बताएका छन्।
आइतबार प्रतिनिधि सभा बैठकपछि सञ्चारकर्मीसँग कुराकानी गर्दै नेकपा एमाले सांसद योगेश भट्टराईले शान्ति प्रक्रिया पुष्पकमल दाहाल 'प्रचण्ड'को मागी खाने भाँडो भएको बताएका हुन्।
'शान्ति प्रक्रिया भन्ने कुरा प्रचण्डको मागी खाने भाँडो भइसकेको छ,' उनले भने, 'बेलाबेला अलि अप्ठ्यारो पर्यो भने शान्ति प्रक्रिया भन्ने। सरकारमा गएपछि शान्ति प्रक्रिया सबै बिर्सिने।’
यस्तै, भट्टराईले सरकारसँग संसद चलाउन कुनै पनि योजना नभएको बताएका छन्।
'यो सरकारसँग संसद चलाउने कुनै योजना नै छैन, दृष्टिकोण नै छैन। संसदलाई कसरी व्यस्त बनाउने,' उनले भने, 'सत्य निरूपण, मेलमिलाप आयोगसँग सम्बन्धित विधेयक जुन छ, त्यसलाई यो सदनले टुंग्याउनुपर्थ्यो। त्यसमा प्रतिपक्षी दलसँग सामान्य छलफल पनि नगरीकन उहाँहरूले अगाडि सार्नुभयो।'
