प्रधानमन्त्री पुष्पकमल दाहाल प्रचण्डले भुटानी शरणार्थी प्रकरण सुरूवातमात्रै भएको बताएका छन्।
उनले शनिबार पार्टी निकट नेपाल दलित मुक्ति मोर्चाले काठमाडौंमा आयोजित कार्यक्रमलाई सम्बोधन गर्दै यो प्रकरण ट्रेलरमात्रै भएको बताएका हुन्।
‘अस्ती मजदुरहरूको महाधिवेशनमा मैले घोषणा गरेको थिएँ। अब भ्रष्टाचारीहरूको फाइल खोलिन्छ। कुनै पनि हालतमा भ्रष्टाचारीलाई छुट दिन सकिँदैन। अहिले त्यो प्रक्रिया सुरू भएको छ, यो सुरूवात मात्रै हो। यो ट्रेलरमात्रै हो। हेर्दै जानु, सिंगै फिल्म देखिन्छ। सिंगै फिल्म देखिनेवाला छ,’ उनले भने।
यस्तै आफू भ्रष्टाचारविरूद्ध लाग्दा ठूलाठूला घेराबन्दीहरू हुने तर जनताको साथ भएमा दबाब र धम्कीको पनि सामना गर्ने उनले बताए।
‘त्यसपछि पक्कैपनि ठूल्ठूला घेराबन्दी होलान्। ठूल्ठूला दबाब आउलान्। धम्कीहरू होलान्। धेरै चिजहरू हुनसक्छ यो बिचमा, तर हाम्रो उत्पीडित वर्ग समुदाय, हाम्रो श्रमजिवी समुदाय साथमा भयो भने जतिसुकै ठूला घेराबन्दी दबाब र धम्कीको सामना गरिनेछ,’ उनले भने।
अहिले भुटानी शरणार्थी प्रकरणमा संलग्न व्यक्तिहरूले आफूहरू सडकमा आन्दोलन गर्न जाँदा पनि व्यंग्य गरेको कुरा पनि उनले बताए। तर काठमाडौंका सडकमा लाखौं जनता आएर प्रतिगमनलाई र षड्यन्त्रलाई पररास्त पारेको उनले बताए।
त्यस्तै अहिले आफूहरूलाई ३२ सिटे भन्ने गरेको पनि उनले बताए।
‘अहिले पनि एक थरी मान्छेले सपना देखेका होलान्। माओवादी अब कमजोर भएको छ, ३२ सिटे, हाम्रो नाम त्यस्तो भएको छ क्या ३२ सिटे। अब हामी फेरि एकचोटी गर्जियौं भने यो ३२ सिट बहुमत सिटमा पुग्छ र नेपाल कब्जा हुन्छ,’ उनले भने।
