नेकपा (एमाले)का अध्यक्ष केपी शर्मा ओलीले नक्कली भुटानी शरणार्थी प्रकरणमा पार्टीविरूद्ध क्याम्पेन लान खोजिएको भन्दै आक्रोश पोखेका छन्।
आइतबार बसेको संसदीय दलको बैठकमा उनले उक्त प्रकरणमा व्यक्ति दोषी हुन सक्ने तर पार्टीलाई नै मुछ्न खोजेको बताएका हुन्।
आफूले प्रधानमन्त्री पुष्पकमल दाहाल ‘प्रचण्ड’लाई भेटेर यस विषयमा कुनै दबाब पनि नदिएको उनले बताए। आफूसँगको भेटपछि प्रधानमन्त्री प्रचण्डले शरणार्थी प्रकरणमा कसैको दबाबमा पर्दिनँ भनेकामा प्रश्न पनि गरे।
‘म प्रचण्डलाई भन्न चाहन्छु- पछि हट्नुस् कसले भन्यो? झुक्नुहोस् कसले भन्यो? दबाबमा पर्नुस् कसले भन्यो? कसले दबाब दियो? मैले उहाँलाई कसैलाई बचाइदिनुस्, छानबिन नगरिदिनुस्, होलो खुकुलो गरिदिनुस्, छाड्दिनुस् भनें? मैले त भनेको छु- कडाइका साथ छानबिन गर्नुस्, कारबाही गर्नुस्,’ दलको बैठकमा उनले भने, ‘तर, एउटा कुरो जसरी एमालेका विरूद्ध क्याम्पेन लान खोजिँदैछ, यस प्रसंगमा, व्यक्ति कोही दोषी होलान्, म जान्दिनँ, पछि तथ्यहरूले बताउँलान् तर एमालेलाई जसरी घचेट्न खोजिँदैछ, त्यो दुष्प्रयास कसैले नगरे हुन्छ।’
अध्यक्ष ओलीले आफूलाई बोलाएर अरू प्रसंगमा कुरा गरेको तर बैठक सकेर निस्किएपछि दबाबमा पर्दिनँ भन्दै ‘फुइँ’ लगाएको बताए।
