नेपाली कांग्रेसको १५औं महाधिवेशनबाट दाङका सहोदर दाजुभाइ किरण किशोर घिमिरे र कमल किशोर घिमिरे केन्द्रीय सदस्यमा निर्वाचित भएका छन्।
दाजु किरण खुला केन्द्रीय सदस्यमा निर्वाचित हुँदा भाइ कमल लुम्बिनी प्रदेश भूगोलबाट निर्वाचित भएका हुन्।
किरण गत प्रतिनिधिसभा निर्वाचनमा दाङ क्षेत्र नम्बर २ बाट पराजित भएका थिए।
दाङबाट कांग्रेस केन्द्रीय सदस्यमा उम्मेदवारी दिएका १६ जनामध्ये ६ जना मात्रै निर्वाचित भएका छन्।
१० जना पराजित भएका छन्।
निर्वाचनबाट दाङले एक जना पदाधिकारीसहित पाँच जना केन्द्रीय सदस्य पाएको छ।
दाङ क्षेत्र नम्बर १ बाट प्रतिनिधित्व गर्ने योगेन्द्र चौधरी थारू क्लस्टरबाट सहमहामन्त्रीमा निर्वाचित भएका छन्।
उनी गत पुसमा भएको विशेष महाधिवेशनबाट पनि सहमहामन्त्री चयन भएका थिए।
१४औँ महाधिवेशनमा शेरबहादुर देउवा समूहबाट पहिलोपटक केन्द्रीय सदस्य बनेका चौधरी गत फागुन २१ गते भएको प्रतिनिधिसभा निर्वाचनमा पराजित भएका थिए।
उनका सहोदर दाजु सुरेन्द्र चौधरी राष्ट्रिय स्वतन्त्र पार्टी (रास्वपा) का समानुपातिक सांसद छन्।
लुम्बिनी प्रदेशसभा सदस्य अनुराग खड्का ३५ वर्षमुनिको युवा समूहबाट केन्द्रीय सदस्यमा निर्वाचित भएका छन्।
उनी स्वर्गीय नेता खुमबहादुर खड्काका एक्ला छोरा हुन्।
बुवाको निधनपछि राजनीतिमा सक्रिय भएका अनुराग १४औँ महाधिवेशनमा दाङ क्षेत्र नम्बर १ बाट सर्वाधिक लोकप्रिय मतसहित महाधिवेशन प्रतिनिधि निर्वाचित भएका थिए।
१५औं महाधिवेशनमा पनि उनी सहजै महाधिवेशन प्रतिनिधि बनेका थिए। गत पुसमा भएको विशेष महाधिवेशनको पक्षमा खुलेका अनुराग २०७९ सालको निर्वाचनमा २८ वर्षको उमेरमा दाङ क्षेत्र नम्बर १ (ख) बाट प्रदेशसभा सदस्य निर्वाचित भएका थिए।
दाङ क्षेत्र नम्बर २ बाट प्रतिनिधित्व गर्ने पूर्वराष्ट्रियसभा सदस्य अनिता देवकोटा महिला खुला समूहबाट केन्द्रीय सदस्यमा निर्वाचित भएकी छन्।
लुम्बिनी प्रदेशका निवर्तमान मन्त्री प्रचण्डविक्रम न्यौपाने पनि भूगोलतर्फबाट केन्द्रीय सदस्यमा निर्वाचित भएका छन्। उनी २०७९ सालको निर्वाचनमा दाङ क्षेत्र नम्बर २ (ख) बाट प्रदेशसभा सदस्य निर्वाचित भएका थिए।
योगेन्द्र चौधरी र अनुराग खड्का।
दाङका तीन निर्वाचन क्षेत्रमध्ये क्षेत्र नम्बर ३ बाट उम्मेदवारी दिएका कुनै पनि नेता निर्वाचित हुन सकेनन्।
यस क्षेत्रबाट लामो समयदेखि कांग्रेसको राजनीतिमा सक्रिय दीपक गिरी उपसभापति पदमा पराजित भए।
उनी ३५ वर्षदेखि निर्वाचनमा प्रतिस्पर्धा गर्दै आएका नेता हुन्।
गिरी गत फागुन २१ गतेको प्रतिनिधिसभा निर्वाचनमा पनि पराजित भएका थिए। उनी गत पुसमा भएको विशेष महाधिवेशनमा सहभागी भएका थिएनन्।
क्षेत्र नम्बर ३ कै लगातार तीन कार्यकाल क्षेत्रीय सभापति बनेका जगतबहादुर खड्का खसआर्य समूहबाट केन्द्रीय सदस्यमा पराजित भए।
गोविन्दबहादुर शाह (शम्भू) खुला केन्द्रीय सदस्यमा पराजित भए। डा. नहकुल केसी र मोहन लम्साल विज्ञ समूहबाट निर्वाचित हुन सकेनन्। देविका नेपाली घिमिरे दलित समूहबाट पराजित भइन्।
त्यस्तै, दाङ क्षेत्र नम्बर २ बाट प्रतिनिधित्व गर्ने दलित संघ दाङका अध्यक्ष बाबुराम विश्वकर्मा दलित समूहबाट पराजित भए।
क्षेत्र नम्बर १ बाट प्रतिनिधित्व गर्ने प्रदीपराज शर्मा भूगोलतर्फबाट पराजित भए। उनी यसअघि विशेष महाधिवेशनबाट केन्द्रीय सदस्यमा निर्वाचित भएका थिए।
गिरिजादेवी न्यौपाने महिला भूगोल र लीला नेपाली दलित महिला समूहबाट पराजित भए।
.JPG)
-1746513231.jpg)
