नेपाली कांग्रेसका सांसद राजेन्द्र बजगाईले भ्रष्टाचारका विषयमा प्राय: एकै व्यक्ति सबैका प्रिय पात्र रहने देखिएको बताएका छन्।
प्रतिनिधि सभाको आजको बैठकमा बोल्दै उनले भ्रष्टाचारका विषयमा जोडिएका पात्रहरू शक्तिशालीसमेत रहेको बताए।
‘संसदमा जटिल विषय प्रवेश गरेका छन्। भ्रष्टाचारका विषयमा प्रायः एकै व्यक्ति सबैका प्रिय पात्र छन्। उनीहरू खतरनाक सर्प हुन् शक्ति केन्द्र र राज्यसंयन्त्र हल्लाइ दिन्छन् वा भ्रष्टाचारीका अन्द्रा बाघका जस्ता छोटा हुन्छन् उनिहरूको पाचनशक्ति बलियो हुन्छ,’ उनले भने।
बजगाईले रास्वपा सांसद स्वर्णिम वाग्लेले संसदमै 'कांग्रेसको घोषणा पत्र लेखिदिएको र त्यो पढेर कार्यान्वयन गर्न अर्थमन्त्रीलाई आग्रह गरेको' प्रसंग समेत उठाएका थिए।
‘सुवर्णशम्सेर जबराको बजेट भाषणमा अंग्रेजका मित्रहरूको सहयोग रहन सक्यो होला त्यहाँ मोटिभेसनल फन्ड उपयोग भएनन्। तत्कालीन कांग्रेस अर्थशास्त्रीले संसदमा कांग्रेस अर्थमन्त्रीलाई मैले लेखिदिएको घोषणा पत्र हेर्नुस भनेर बोल्दैगर्दा म वहाँलाई सम्झाउन चाहन्छु कि तपाईको कांग्रेसप्रतिको स्नेह मोटिभेसनको मोह थियो, कांग्रेसले त्यसबापत तपाईलाई नियुक्ति दिएको तथ्य छ। शाही पार्श्ववर्ती र जर्नेलहरू राज्यसंयन्त्र बाट निवृत्त भएपछि 'म' ले भरिएको किताब लेख्छन्।’
उनले पर्यटन, ऊर्जा, कृषिलाई प्राथमिकताको क्षेत्रमा राख्नुपर्ने पनि बताए। ‘गाउँ खाली भइरहेका छन्। युवाहरू पलायन भैरहनु भएको छ। कम्तिमा पनि यो गृह प्रशासन र पर्यटनलाई सँगै राखेर हिमाली नाका छुने पदयात्रा खुलाइदिनुहोस्,’ उनले भने।
चालु खर्च कटौती गर्ने र नेतादेखि तल्लो तहका सुविधा कटौती गर्न पनि उनले अर्थमन्त्रीलाई आग्रह गरेका छन्।
