नेकपा (एमाले) को सचिवालयको बैठक सकिएको छ।
मंगलबार दिउँसो पार्टी केन्द्रीय कार्यालय च्यासलमा बसेको बैठकले केन्द्रीय कमिटी बैठकका लागि १० वटा एजेन्डा तय गरेको छ।
बैठकका निर्णयबारे जानकारी दिँदै एमाले प्रचार विभाग प्रमुख पृथ्वीसुब्बा गुरूङले पर्सि (बिहीबार) देखि सुरू हुने केन्द्रीय कमिटीका लागि विभिन्न एजेन्डा तय भएको जानकारी दिए।
नक्कली भुटानी शरणार्थी प्रकरणमा मुछिएर फरार रहेका एमाले सचिव टोपबहादुर रायमाझीबारे के कुरा भयो भन्ने प्रश्नमा गुरूङले एमाले विधिको शासन मान्ने पार्टी भएकाले कानुन र विधिअनुसार भएको अनुसन्धानलाई सघाउने कुरा भएको बताए।
‘यसमा हामीले लामो छलफल र निर्णय गरिराख्नुपर्ने विषय परेन। नेकपा एमाले कानुनको शासनमा विश्वास गर्ने पार्टी हो। कमरेड टोपबहादुर रायमाझीको हकमा विधिपूर्वक हुने अनुसन्धानमा सघाउने भन्नेछ,’ उनले भने।
