नेपाली कांग्रेसका नेता शेखर कोइरालाले नक्कली शरणार्थी मामिलामा दोषी देखिने जो-कोहीलाई कारवाही हुनुपर्ने दृढता प्रकट गरेका छन्।
बुधबार बिहान विराटनगर विमानस्थलमा पत्रकारहरूसँग कुरा गर्दै नेता कोइरालाले यो मामिलामा कुनै ‘इफ र बट’ हुन नहुने बताएका हुन्।
‘यो मामिलामा कुनै इफ र बट हुनु हुँदैन, जो-जो दोषी देखिए पनि कारबाही हुनुपर्छ,’ उनले भने, ‘यो मुलुककै लागि लज्जाको विषय हो।’
कोइराला विमानस्थलमा पत्रकारहरूसँग कुराकानी गर्दै गर्दा काठमाडौंमा कांग्रेस नेतासमेत रहेका पूर्वगृहमन्त्री बालकृष्ण खाण पक्राउ परिसकेका थिए।
एक अर्को प्रसंगमा नेता कोइरालाले महामन्त्री गगन थापाले पछिल्लो समय अभिव्यक्ति दिएकोबारे त्यो आफूतिर नभई सभापतितिर लक्षित भएको बताए।
‘मसँग गगनजीको निरन्तर कुरा भइरहेको छ। असन्तोषको कुरा मसित होइन, सभापतितिर हो,’ उनले भने।
