नेकपा (एमाले) का अध्यक्ष केपी शर्मा ओलीले सर्वोच्च अदालतको परमादेशलाई सच्याउन पुष्पकमल दाहाल ‘प्रचण्ड’लाई प्रधानमन्त्री बनाएको बताएका छन्।
बिहीबारबाट सुरू भएको केन्द्रीय कमिटीको पाँचौं बैठकमा पेश गरेको आफ्नो राजनीतिक प्रतिवेदनमा ओलीले २०७८ असारमा शेरबहादुर देउवालाई प्रधानमन्त्री बनाउन सर्वोच्च अदालतले दिएको परमादेश गलत भएको दोहोर्याएका हुन्। त्यसले राजनीतिलाई गलत दिशातिर धकेलेको बताउँदै त्यसलाई सच्याउन माओवादी केन्द्रलगायत सात दलसँग गठबन्धन गरेको बताएका छन्।
तर देशलाई अन्त्यहीन अस्थिरतातिर लैजाने, भ्रष्टाचार, साधन स्रोतको दोहन गर्न चाहने शक्तिले गठबन्धन फुटाएको ओलीको बुझाइ छ।
‘माओवादी केन्द्रलाई दक्षिणपन्थी अवसरवादी ओरालो यात्राबाट रोक्न सकिएन,’ ओलीले प्रतिवेदनमार्फत् भनेका छन्, ‘राष्ट्रपति निर्वाचनसम्म आइपुग्दा ऊ नेपाली कांग्रेससँग समर्पण गर्न पुग्यो। माओवादी केन्द्रबाट प्रदर्शित यस राजनीतिक बेइमानी, चरम अस्थिरता र नांगो अवसरवादले राष्ट्रिय राजनीतिलाई पुरानै विन्दुमा धकेलेको छ।’
माओवादी केन्द्रको अवसरवादी, अविश्वसनीय र अस्थिर चरित्रसँग आफू अपरिचित भने नरहेको ओलीको तर्क छ।
‘गएको छ वर्षमा हामीमाथि पटक-पटक यस ढंगको धोका भएको छ। संविधान जारी गर्न निर्णायक नेतृत्व गरेको, नाकाबन्दीको सामना गरेको र पारवहन सन्धिमार्फत् नेपालको परनिर्भरतालाई अन्त्य गरेको २०७२/०७३ सरकारलाई विफल पार्न माओवादी आफैं अग्रसर भएको थियो,’ ओलीले भनेका छन्।
