नेपाली कांग्रेसका केही सांसदहरूले केन्द्रीय सदस्यसमेत रहेका पूर्वगृहमन्त्री बालकृष्ण खाण पक्राउपछि सभापति शेरबहादुर देउवासँग भेटेर छलफल गरेका छन्।
गत वैशाख २७ गते खाणलाई उनकै निवासबाट प्रहरीले पक्राउ गरेको थियो।
खाण पक्राउ परेको भोलिपल्ट कांग्रेस सांसदहरूले यसबारे सभापति देउवालाई धुम्बाराहीस्थित निवासमा भेटेर कुराकानी गरेका थिए।
नेपालीलाई नक्कली भुटानी शरणार्थी बनाएर ठगी गरेको आरोप लागेका खाणलाई प्रहरीले पक्राउ गरी थप अनुसन्धान अघि बढाएको छ। उनलाई आइतबार दोस्रो पटक ४ दिनको म्याद थप भएको छ।
खाण पक्राउ पछि उनीनिकट मानिएका सांसदहरू नागिनाकुमारी यादव, कान्तिका सेजुवाल, रूपा विक, सुशीला थिङ र सीता रानाले धुम्बाराही पुगेर सभापति देउवासँग कुराकानी गरेका थिए।
‘खाण पक्राउ परेपछि यो विषय के हो भनेर हामी सभापतिज्यूसँग बुझ्न गएका थियौं,’ धुम्बाराही पुगेर सभापति देउवासँग भेट गरेकीमध्ये एक सांसदले सेतोपाटीसँग भनिन्, ‘यसरी नेताहरू पक्राउ पर्न थालेका छन्, कुरा के हो भनेर सभापतिज्यूसँग सोधिएको हो।’
सांसदद्वय यादव र सेजुवालले सभापति देउवासँग छलफलका लागि जाने भन्दै अग्रसरता लिएका थिए। ‘उहाँहरू गाडी नै लिएर आउनुभएको थियो। हामी त उपस्थित मात्र भएका हौं, सभापतिज्यूसँग यादव र सेजुवालले नै कुराकानी गर्नुभएको हो,’ ती सांसदले भनिन्।
जवाफमा सभापति देउवाले यो विषयमा सांसदहरूले चासो दिइरहनु नपर्ने र प्रक्रियाअनुसार नै अघि बढ्ने बताएका थिए।
‘यो विषयमा तिमीहरूले केही भन्नु पर्दैन। जे हुन्छ, हुँदै गर्छ। यो विषयमा जे-जति बाहिर आएका छन्, त्यस्तो होइन भन्ने खालका कुरा सभापतिज्यूको थियो,’ देउवाका भनाइ उद्धृत गर्दै ती सांसदले भनिन्, ‘उहाँले यो विषय प्रक्रियाअनुसार नै अघि बढ्छ भन्नुभएको छ।’
यो प्रकरणमा पार्टीका अरू नेता पनि मुछिने हुन् कि भनेर सांसदहरूले चासो राखेका थिए।
खाणबारे पार्टीभित्र पनि पदाधिकारी र पूर्वपदाधिकारी बैठकमा पटक-पटक छलफल भएका थिए। खाणलाई निलम्बन गरेर जानुपर्ने संस्थापनइतर पदाधिकारीहरूले माग राखेका छन् भने सभापति देउवा पक्षका पदाधिकारीले अभियोग मात्र लागेकोले अहिले नै निलम्बन गर्न नपर्ने अडान राखिरहेका छन्।
म्याद थपका लागि आइतबार अदालत लगिएका खाणले पत्रकारहरूको प्रश्नको संक्षिप्त रूपमा जवाफ दिँदै यो प्रकरणमा आफू संलग्न नरहेको दाबी गरेका छन्।
खाणसहित उनका सहयोगी नरेन्द्र केसीलाई पनि प्रहरीले पक्राउ गरेको थियो।
यो प्रकरणमा नेकपा एमालेका नेता टोपबहादुर रायमाझी फरार छन्। उनलाई एमालेले सचिवबाट निलम्बन गरिसकेको छ।
प्रहरीले पूर्वगृहमन्त्री रामबहादुर थापा ‘बादल’का सुरक्षा विज्ञ इन्द्रजित राईलाई पक्राउ गरी अनुसन्धान गरिरहेको छ। यही प्रकरणमा पूर्वगृहसचिव टेकनारायण पाण्डे पनि पक्राउ परेका थिए।
