प्रतिनिधि सभाको सार्वजनिक लेखा समितिको समेत प्रत्यक्ष प्रसारण गर्ने तयारी संसद सचिवालयले गरेको छ।
लेखा समितिका सचिव समेत रहेका संसदका प्रवक्ता एकराम गिरीले सम्भव भएसम्म समितिको बैठक प्रत्यक्ष प्रसारण गर्ने तयारी भैरहेको बताए।
'सम्भव भएसम्म प्रत्यक्ष प्रसारण गर्ने सोच समितिको छ', गिरीले भने, 'सांसदहरूले पनि पारदर्शी हुनुपर्ने बताउनु भएको छ।'
जेष्ठ सदस्यका हैसियतले लेखा समितिको बैठक सञ्चालन गरेका कांग्रेस सांसद अर्जुननरसिंह केसीले आजको बैठकमा समिति बैठक पारदर्शी बनाउनुपर्ने बताएका थिए।
'म सचिवलाई निर्देशन गर्दछु। यो लेखा समितिको कार्य सार्वजनिक हुनुपर्छ। जनताले थाहा पाउनुपर्छ लेखा समितिमा बसेका सांसदहरूले नेताको ह्विप मानेर कसलाई बचाउन काम गरिराखेका छन् भन्ने जनताले थाहा पाउनुपर्छ', सभापति केसीले भने, 'जनप्रतिनिधिले लुकेर काम गर्नुहुँदैन।'
राष्ट्रिय स्वतन्त्र पार्टीका सांसद मनिष झाले बैठकमा लेखा समितिमा भए गरेका काम कारबाही ट्विटर, फेसबुक लगायतका सामाजिक सञ्जालबाट सार्वजनिक गर्नुपर्ने बताएका थिए।
'समितिका काम रेकर्डेड गर्ने गरेको भए पनि संसदीय समितिबाट मतदाता र करदाताले के अपेक्षा गर्ने भन्नेमा अस्पष्टता छ', झाले भने, 'समितिले के गर्छ भन्ने मानिसहरूलाई थाहा छैन।'
नेकपा एमालेका सांसद गोकुल बाँस्कोटाले पनि समितिको बैठक पारदर्शी हुनुपर्ने र बेथितिहरूलाई नियन्त्रण गर्ने काममा प्रभावकारी बनाउनुपर्ने बताएका थिए।
