नेपाली कांग्रेसका केन्द्रीय सदस्य गोविन्द भट्टराईले पदमा नरहने पनि जिल्लाको विकासमा आफ्नो ध्यान हुने बताएका छन्।
गत वैशाख १० गते सम्पन्न तनहुँ क्षेत्र नम्बर १ को उपनिर्वाचनमा सत्तारूढ गठबन्धनका तर्फबाट उम्मेदवार बनेका भट्टराईले शनिबार आँबुखैरेनी गाउँपालिकामा आयोजित धन्यवाद ज्ञापन कार्यक्रममा आफूले कहिल्यै पनि पदलाई प्राथमिकतामा नराखेको बताए।
'निर्वाचन लोकतान्त्रिक पद्धति हो। यो पद्धति ल्याउन देशमा ठूलो बलिदान र संघर्ष गरेका छौं,' उनले भने, 'संघीय लोकतान्त्रिक गणतन्त्रमा जनताबाटै नेता छान्ने प्रणालीको संस्थागत विकास गर्न सफल भएका छौं।'
नेता भट्टराईले निर्वाचनमा हारजित सामान्य भएको बताउँदै यसलाई खासै ठूलो कुरा मान्न नहुने उल्लेख गरे।
भट्टराईले भने, 'पञ्चायती निरंकुशताविरूद्ध राजनीति सुरू गरेको हुँ, पदका लागि होइन। मैले चुनाव हारे पनि जिल्लाको विकास निर्माणमा मेरो प्राथमिकता हुनेछ।'
भट्टराईले उपनिर्वाचनमा विजय हासिल गरेका राष्ट्रिय स्वतन्त्र पार्टीका डा. स्वर्णिम वाग्लेलाई बधाइ दिँदै उनको काम हेर्न बाँकी रहेको जिकिर गरे।
'हामीले बहुसंख्यक मतदातालाई बुझाउन सकेनौं, मतदाताको मन जित्न सकेनौं,' उनले भने।